КъМР-ни Парламентини президиумуну кезиулю жыйылыуунда «правительстволу сагъатны» чеклеринде депутатла 2020 жылда республиканы иелигинде болгъан ырысхыны приватизациясы къалай бардырылгъанын сюзгендиле. Жыйылыуну спикер Татьяна Егорова бардыргъанды.
Приватизация программаны юсюнден докладны жер эм ырысхы халла министр Аслан Тохов этгенди. Аны билдиргенине кёре, былтыр акцияланы жети пакетин, чекленнген жууаплылыгъы болгъан юч обществону уставной капиталында республиканы юлюшюн, жеринден тепдирилмеген 22 объектни, эки машинаны приватизация этерге белгиленнгенди. Андан сора да, бир къырал предприятияны акцияларын чыгъарып сатаргъа план болгъанды. Аладан республикалы бюджетге 296 миллион сом тюшерге керек эди.
Докладчыны айтханына кёре, былтыр акцияланы бир пакетин, ООО-ланы уставной капиталларында республиканы эки юлюшюн, бир жер бёлюмню, 11 машинаны сатаргъа къолдан келгенди. Республиканы иелигинде болгъан ырысхыны приватизациясыны программасыны чеклеринде былтыр 238,4 миллион сом, быйылны аллында уа 57,3 миллион сом тюшгенди (2019 жылда– 181,1 миллион сом). Алай бла план кёрюмдюле 80,6 процентге толтурулгъандыла.
Депутатла, докладны сюзе, концессия келишимлени, инвесторланы кёбейтиуню, приватизация программа былтыр иги толтурулгъаныны юслеринден айтхандыла. Татьяна Егорова программагъа кийирилген объектлени бирлерине кёп жылланы ичинде сурам ахырда болмагъанына эс буруп, аны тюрлендириу жаны бла къаллай мадарла этилгенлерин билирге излегенди. Аслан Тоховну айтханына кёре, объектлеге аллай уллу багъаланы оценщикле тохташдырадыла, аны ючюн а инвесторла табылмайдыла. Болсада ведомство прогноз планны толтуруу жаны бла битеу мадарланы этеди.
Экономика политика, инновация айнытыу эм предпринимательство жаны бла комитетни башысы Заур Апшев министерствону ишине иги багъа бергенди: «Жетишимле бардыла, анга уа республикалы бюджетге тюшген ахча кёбейгени шагъатлыкъ этеди»,-дегенди ол. Ахырында депутатла жууаплы органлагъа эсгертиулени къабыл кёргендиле.
