КъМР-ни Башчысы Казбек Коков «Военторг» АО-ну генеральный директору Владимир Павлов, Россейни Къоруулау министерствосуну хапчукла жаны бла службасыны таматасы Валерий Кудрявцев, «ВоенТекстильПром» ООО-ну учредители Аслан Аталиков бла ишчи тюбешиу бардыргъанды. Ушакъгъа КъМР-ни Правительствосуну Председателини биринчи орунбасары Муаед Кунижев, КъМР-ни промышленность, энергетика эмда сатыу-алыу министри Шамиль Ахубеков къатышхандыла.
Тюбешиуню кезиуюнде регионда аскерге, ФСБ-гъа, МВД-гъа, МЧС-ге, ДКС-ге керекли кийимле чыгъарыуну айнытыуну онглары сюзюлгендиле. Аланы тигиу бла кюрешген «ВоенТекстильПром» ООО-ну фабрикасыны Нальчикде, Бахсанда бла Залукокоажеде производство бёлюмлери бардыла. Алада 600-ге жууукъ адам урунады.
Аслан Аталиков билдиргеннге кёре, Нальчикдеги фабрика 2020 жылда республиканы бюджетине налогладан 200 миллион сом чакълы бир жибергенди, миллиард сомгъа тёрт миллион кийим тикгенди. Августда предприятияда жангы проект къолгъа алынырыкъды, аны хайырындан производствону ёлчеми ёсерикди, ишчи жерлени саны да 800-ге дери жетдирилликди. Предприятие программалы амаллары болгъан шёндюгю оборудование бла жалчытылгъанды.
Валерий Кудрявцев фабрика чыгъаргъан продукциягъа бийик багъа бергенди эмда Нальчикни предприятиясында тигилген аскер кийимледе быйыл танк батальонладан бири Къызыл Майданда аскер парадха къатышханын да билдиргенди.
Владимир Павлов а, предприятияны продукциясы аскер бёлюмлеге деп чыгъарылгъанын эсге салып, аны качествосуна сакъ болургъа, заказны терк толтуруугъа, ишге жууаплы кёзден къараргъа кереклисин чертгенди. «Бирге ишлеуге энчи эс бурулгъаны да аны ючюндю. Нальчикдеги предприятие Военторгну бир кесегиди, аны кенгертирге белгиленеди»,-дегенди.
Казбек Коков къонакълагъа жюрек ыразылыгъын билдиргенди. «ВоенТекстильПром республиканы бюджетине уллу къошумчулукъ этгенин да чертгенди. «Пандемияны кюч алгъан кезиуюнде ол бизге ишибизни селейтмезге, производствону ёсдюрюрге онг бергенди»,-дегенди. Республиканы оноучусу Къабарты-Малкъарда тынгылы продукция чыгъарырын сюйгенлерин айтып, производствону айнытыугъа хар жаны бла да себеплик этилирине ышандыргъанды.
