КъМР-ни Башчысы Казбек Коков бу кюнледе «Ростелеком» ПАО-ну Къабарты-Малкъарда бёлюмюню директору Залим Хутов бла тюбешгенди. Ала экиси да регионда цифралы амалны сингдириуню онгларын сюзгендиле, ол экономиканы айнытыуну эмда социал жумушла бла халькъны бютюн тынгылы жалчытыуну себеби болгъанын айырып айтхандыла.
Тюбешиуню кезиуюнде дагъыда оптикалы инфраструктураны айнытыуну, социал бёлюмню информатизациялауну юсюнден да сёлешиннгенди. Миллет проектлени хайырындан акъыллы технологияла регионнгу саулукъ сакълау эмда билим бериу бёлюмлерине кийирилгендиле. Сёз ючюн, саулукъ сакълауну бир къырал информация системасыны регион кесеги къуралгъанды.
Анга республикада битеу къырал медицина организацияла къошулгъандыла. Энди республикада жашагъан хар адамны да врачха онлайн амал бла жазылыргъа, медицина организацияланы уа керекли информацияны бир бирлерине связьны жабыкъ каналларыны юслери бла билдирирге онглары барды. Телемедицина амалла да кюч ала барадыла. Ала биринчи медицина болушлукъ берген бёлюмню энчи больницала бла байларыкъдыла.
Билим бериуде да узакъдан окъутууну амалы сингдириледи. Аны хайырындан пандемияны кючлю кезиуюнде школлада бла вузлада дерсле бериуню тохтатмазгъа къолдан келгенди.
Сатыу-алыуда, халкъны жумушларын жалчытыуда, ЖКХ-да уа бек алгъа тёлеулени ахчаны къолдан-къолгъа бермей ётдюрюрча амалла сингдириледиле. Аланы хайырындан жангылычла азайтылгъандыла. Туризмде цифралы мадарла таулада солургъа сюйгенлени къоркъуусузлукъларын жалчытыргъа себеплик этедиле.
Ушакъны кезиуюнде дагъыда цифралы технологияланы жоллада, адамла кёп жыйылыучу жерледе, ол санда билим бериу учреждениялада да, хайырланыуну онгларына къаралгъанды. Регионда «Къоркъуусуз республика» система ишлейди, жолда жюрюуню жорукъларына бузукълукъ этгенлени эсепге алып къойгъан 86 комплекс тохташдырылгъанды, дагъыда халны видео бла къарап, кёрюп тургъан 50 стационар системаны орнатыргъа белгиленеди.
Транспортдагъы цифралы системаланы андан ары игилендире барыу да уллу ауурлукъ жетген жоллада машинала тыйгъычсыз жюрюрча этерге, аварияланы терк кёрюрге эмда мычымай болушлукъгъа келирге онг берликди. Оператив службаланы бир номер бла – 112 – чакъырыу система да игилендириле барлыкъды.
Битеу сагъынылгъан ишлени «Цифровой регион» деген бир платформада бирикдирир план барды. Ол а тюрлю-тюрлю къыйын болумлагъа кёре терк мадарла этерге, субъектни социал-экономика халына тюз багъа бичерге онг бериликди. Проектлени асламысын 2021-2022 жыллада толтурургъа белгиленеди.