Къабарты-Малкъар Республиканы Башчысы Казбек Коков «НСПК» АО-ну генеральный директору Владимир Комлев, Россей Банкны Юг ГУ-ну таматасы Евгений Эберенц, КъМР-де НБ-ны бёлюмюню управляющийи Мурат Керефов, «НСПК» АО-ну продуктларыны, цифралы эм технология сервислерин айнытыу директору Мария Точилова бла ишчи тюбешиу бардыргъанды. Анга КъМР-ни Правительствосуну Председатели Мусукланы Алий, КъМР-ни Правительствосуну Председателини биринчи орунбасары Муаед Кунижев, КъМР-ни цифралы айнытыу министри Ислам Ашхотов къатышхандыла.
Ушакъны чегинде Россейни Президентини цифралы экономиканы эм тапдырылгъан къырал жумушланы качестволарын ёсдюрюуню айнытыугъа бурулгъан буйрукъларына тийишлиликде республикада финансла болмагъан сервислени проектин жарашдырыу жаны бла «жол картаны» жашауда бардырыу сюзюлгенди. Владимир Комлев «Регионда жашагъанны бирлешдирилген картасы» проектни къолайлыгъын эм Минги тауну тийресинде «Мир» картаны мурдорунда финансла болмагъан сервислени кийириуню онгларыны юсюнден айтханды. «Регионда жашагъанны картасы» адамлагъа тюрлю-тюрлю бюджет тёлеулени, социал сервислени эм жумушланы алыу ишлени женгиллендирирге болушурукъду, андан сора да, харкюнлюк сатыу-алыуланы этгенде кешбек къоллу болургъа да. Дагъыда «Мир» тёлеу система регионда туризмни айнытыугъа билеклик этеди, Къабарты-Малкъарны курортларында безналичный тёлеуню онгларын кенгертип», - деп белгилегенди ол.
Шёндюгюлю технологияланы айнытыу финанс онгланы битеулю халына эм безналичный тёлеулени кёбейтилиулерине тап келеди. Анга Къабарты-Малкъарда НБ-ны бёлюмюню управляющийи Мурат Керефов эс бургъанды. «Кёп функциялы аралада электрон терминалланы хайырланыу онгланы кёбейтиу иш бардырылады. Ала Нальчикде эм республиканы районларында бир ненча бёлюмледе орнатылгъандыла. Финанс жарыкъландырыу жаны бла да тири иш бардырылады. Шартлагъа кёре, Къабарты-Малкъарны школлары Россейни Банкыны жазгъы сессиясыны онлайн-дерслерине къатышханладан эм тириледен бири болгъанды», - деп белгилегенди Мурат Керефов.
Ишчи тюбешиуню эсеплерине кёре, КъМР-ни Башчысы Казбек Коков КъМР-ни Правительствосуна республикада энчи учреждениялада пилот проектлени сингдирип башлау предложениялагъа къарарча буйрукъ бергенди. Ол иш къысха заманны ичинде эм качестволу тындырылыргъа тийишлиди.