|
ДАХ-м пщIэ яхуещI
17 мая, 2021 - 06:55
Дунейпсо Адыгэ Хасэм и IуэхущIапIэм накъыгъэм и 8-м щекIуэкIащ ТекIуэныгъэ Иным и махуэм и щIыхькIэ къызэрагъэпэща гуфIэгъуэ зэхыхьэ.
Зэхуэсым кърагъэблэгъат Хэку зауэшхуэм и ветеранхэу Багъ Сэфудин, Герасименкэ Нинэ, Долбня Борис, Калабуховэ Валентинэ, Ламырдон Хьэсэнбий. Апхуэдэуи зэIущIэм хэтащ УФ-м и Президентым и Администрацэм Къэрал кIуэцI политикэмкIэ и управленэм и чэнджэщэгъу Баах Сергей, УФ-м и Жылагъуэ палатэм хэт Нэхущ Заурбий, ЦIыхум и хуитыныгъэхэмкIэ уполномоченнэу Къэбэрдей-Балъкъэр Республикэм щыIэ Зумакулов Борис, РСФСР-м щIыхь зиIэ и артисткэ ЖьакIэмыхъу КIунэ, КъБР-м и цIыхубэ артисткэ Хьэмыку Жаннэ, Зауэм, лэжьыгъэм, IэщэкIэ ЗэщIэузэда Къарухэм, хабзэхъумэ органхэм я ветеранхэм (пенсионерхэм) я Къэбэрдей-Балъкъэр жылагъуэ зэгухьэныгъэм и тхьэмадэ Шыхъуэбахъуэ Мухьэмэд, Джылахъстэней и Адыгэ Хасэм и тхьэмадэ КIэрэф Мурадин, нэгъуэщIхэри.
Кърагъэблэгъа нэхъыжьхэм фIыщIэ хуащIащ фашизмэм текIуэным хэлъхьэныгъэныгъэшхуэ зэрыхуащIам папщIэ икIи узыншагъэ быдэ яIэну, илъэс куэдкIэ псэуну ехъуэхъуахэщ.
ЗэIущIэм и къызэгъэпэщакIуэ, Дунейпсо Адыгэ Хасэм и тхьэмадэ Сэхъурокъуэ Хьэутий гуфIэгъуэ зэхыхьэр къыщызэIуихым абы хэт псоми махуэшхуэмкIэ ехъуэхъуащ, Хэку зауэшхуэм и ветеранхэм фIыщIэ яхуищIащ хахуэу хэкур зэрахъумэжам, лIыхъужьыгъэ къызэрагъэлъэгъуам папщIэ.
- Дэтхэнэ зым ди дежкIи Накъыгъэм и 9-р махуэшхуэ нэхъ лъапIэ дыдэщ. ТекIуэныгъэм и махуэм дэ псори дызэкъуегъэувэ икIи Къэбэрдей-Балъкъэрыр, Урысей псор ефIэкIуэным, абыхэм щыпсэухэм нэхъри заужьыным хуэунэтIа IуэхуфIхэр длэжьыным дытрегъэгушхуэ! Ди къэралыгъуэ лъэщым хузэфIэкIащ зауэм и мыгъуагъэ псоми пхыкIын икIи ар дэтхэнэ зыми фи фIыгъэщ, - жиIащ Сэхъурокъуэ Хьэутий, ветеранхэм захуигъазэри. - Дэ фIыщIэшхуэ фхудощI къэвгъэлъэгъуа лIыхъужьыгъэхэм папщIэ. Ди щхьэр лъахъшэу фхудогъэщхъ дэтхэнэ зыми! Сыт хуэдиз илъэс дэкIами, фи щIыхьыр, фи къэмылэнджагъэр, фи къару фызэремыблэжар игъащIэкIи щытынущ къытщIэхъуэ щIэблэм я гъащIэ гъуазэу. Ди гуапэщ узыншагъэ быдэ фиIэну.
Ветеранхэм апхуэдэуи ехъуэхъуащ Нэхущ Заурбийрэ Зумакулов Борисрэ.
Нэхъыжьхэри къыщыпсэлъащ пщыхьэщхьэм. Абыхэм ягу къагъэкIыжащ зауэ зэман хьэлъэр, я гъащIэм и къекIуэкIыкIар. Зауэр зэриухрэ илъэс куэд дэкIыжами, абыхэм фIыуэ ящIэж фронтым щагъэкIуа махуэхэр.
Къэбэрдей-Балъкъэрым щыщ артист цIэрыIуэхэр ветеранхэм къахуэфащ, усэхэм къахуеджащ, ахэр уэрэдхэмкIэ ягъэгуфIащ, езыхэри яфIэфIу ядежьууэ, Iэгу яхуеуэу яхэсащ.
Зэхыхьэм кърихьэлIахэм махуэшхуэ Iэни къыхуащтащ, нэхъыжьхэм фэеплъ саугъэтхэмкIэ, удз гъэгъахэмкIэ яхуэупсащ, ерыскъы щIэщыгъуэхэри хузэралъхьащ.
Ветеранхэм я гуапэ дыдэ хъуащ апхуэдэ гулъытэр икIи зэхыхьэр зи жэрдэмхэм фIыщIэ хуащIащ, ехъулIэныгъэхэр яIэу адэкIи лэжьэну зэрагуапэри къыхагъэщащ.
ГуфIэгъуэ пшыхьым и кIэухым зэгъусэу сурэт зэтрагъэхащ.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|