Бюгюннгю мамыр турмушну жалчытханлагъа – гюлле эмда ёмюрлюк

9 майда -Хорламны Кюнюнде - КъМР-ни Башчысы Казбек Коков «Ёмюрлюк от» мемориалгъа гюлле салгъанды. Эсгериу жумушлагъа Парламентни спикери Татьяна Егорова, премьер-министр Мусукланы Алий, Къырал Думаны депутатлары Геккиланы Заур бла Адальби Шхагошев, федерал инспектор Тимур Макоев, министрле, депутатла да келгендиле. Ол къанлы урушда жанларын бергенлеге баш урургъа Уллу Ата журт урушну эм тылны ветеранлары, жаш тёлю патриот организацияланы келечилери эм жамауат жыйылгъандыла. Келгенлени арасында туристле да болгъанларын белгилерчады.
Митингни аллында уа Казбек Коков ветеранла бла саламлашханды, аланы саулукъларын сурагъанды. Ол таматалагъа узакъ ёмюр, саулукъ тежегенди эмда ол къанлы къазауатда хорлап, бюгюннгю мамыр жашауну сакълагъанлары ючюн ыразылыгъын айтханды.
Ызы бла эсгериу жумушла башланнгандыла. Жыйылгъанла жигитлени бир минут шумсуз туруп эсгергендиле, ызы бла мемориалгъа гюлле салгъандыла.
Уллу Хорламны Кюнюне аталгъан къууанчлы жыйылыула республиканы битеу шахарларында да болгъандыла. Быйыл «Ёлюмсюз полк» акция эпидемиология болум бла байламлы Интернетде бардырылгъанды. Хорламны Кюнюн белгилеу фейерверк бла бошалгъанды.

Тикаланы Фатима.
Поделиться: