Москвада Доброволецлени халкъла аралы форуму кесини ишин бошагъанды. Анда анга аталгъан жылны эсеплери чыгъарылгъандыла.  Форумгъа Россейни битеу регионларындан бла тыш къыралладан да 12 мингнге жууукъ волонтёр къатышханды.
-Сизни къыйыныгъыз кирмеген бюгюнлюкде бир иш да жокъду. Сизни хайырыгъыздан кёп больницала, фельдшер-акушер пунктла жангыртыладыла, сиз кёплеге эс тапдырасыз, табийгъатны къоруулайсыз, юйсюзлеге болушасыз. Тас болуп сизни хайырыгъыздан табылгъанланы саны  окъуна 10 мингден аслам болады,-деп, Россейде Доброволецлени (волонтёрланы) жылын  бардырыуну къурау комитетини таматасы Сергей Кириенко  активистлеге жюрек ыразылыгъын билдиргенди.
Кеслерини жашауларын, къыралларыны къадарын игилендирирге, тёгерекдеги болумну тюрлендирирге итиннген, ахшылыкъ этиуню баш жорукъларына санагъан, башхалагъа къайгъыргъан, огъурлулукъларындан юлюш этген адамлагъа бир тюрлю тыйгъыч, чек да жокъдула,деп бошагъанды ол кесини сёзюн.
Форумну чеклеринде «Доброволец России-2018» конкурсда хорлагъанланы саугъалау да болгъанды. Анга уа Россейни Президенти Владимир Путин да къатышханды.  Ол Волонтёрну жылы бошалгъанлыкъгъа, къырал алагъа тутхучлулукъ этгенин къоймазлыгъына ышандыргъанды.  
Былтыр Россейде президент грантха  700-ден артыкъ проект тийишли болгъанды, быйыл а ала 900-ге жетгендиле. Алагъа битеу да 1,7 миллиард сом чакълы берилгенди.
Регион конкурсланы эсеплери да бу жол биринчи кере чыгъарылгъандыла. Алагъа кёре 26 регион федерал бюджетден субсидия халда 200 миллион сом аллыкъды.