КъМР-ни Башчысы Казбек Коков Терроризмге къажау комиссияны бла Оператив штабны жыйылыуун бардыргъанды. Анга Правительствону башчысы Мусукланы Алий, РФ-ни Президентини Шимал-Кавказ федерал округда толу эркинликли келечисини аппаратыны баш федерал инспектору Тимур Макоев, право низамны сакълаучу органланы таматалары, муниципал къуралыуланы администрацияларыны къуллукъчулары къатышхандыла.
Биринчиден, транспортда эмда улоу инфаструктураны объектлеринде терроризмге къажау къоркъуусузлукълары къалай жалчытылыннганлары сюзюлгенди. Транспорт эм жол мюлк министр Аслан Дышековну айтханына кёре, бу бёлюмге «Нальчик» аэропорт, Россейни темир жолларыны бёлюмю, автовокзалла бла автостанцияла киредиле. Алада излемлеге тийишлиликде къоркъуусузлукъну кючлеу жаны бла мадарла бардырыладыла.
Бюгюнлюкде республикада 713 видеокамера орнатылгъанды, право низамны сакълаучуланы эсгертиулери бла алада жазылгъан шартла аманлыкъланы тинтгенде хайырланыладыла. Быйылны биринчи кварталында «Къоркъуусуз республика» системаны болушлугъу бла 53 право бузукълукъ ачыкъланнганды.
Бу соруу бла байламлы докладланы СКФО-да Ространснадзорну регионла аралы управлениясыны таматасы Альмурза Баратов, «Аэрокомплекс» комплексни толтуруучу директору Виталий Беланов, «Нальчикмежтранс» муниципал унитар предприятияны оноучусу Олег Кандоров этгендиле.
Казбек Коков транспорт объектледе терроризмге къажау ишни игилендириу мадарланы къысха заманны ичинде толтурургъа буюргъанды. Быллай жумушланы республиканы Башчысы отлукъ-энергетика комплексни, сатыу-алыуну объектлеринде, адамла кёп жыйылгъан жерледе тамамларгъа кереклисин эсгертгенди.
Бу тема бла байламлы докладланы Росгвардияны КъМР-де Управлениясыны башчысыны къуллугъун толтургъан Мурат Мешев, «Рус-Гидро - Кабардино-Балкарский филиал» акционер обществону башчысы Игорь Кладько, промышленность, энергетика эм сатыу-алыу министр Шамиль Ахубеков, граждан обществону институтлары бла байламлыкъла эм миллетлени ишлери жаны бла министрни къуллугъун толтургъан Анзор Курашинов этгендиле.
Шамиль Ахубековну айтханына кёре, къоркъуусузлукъ паспортлары сатыу-алыуну 47 объектинде барды, къалгъанлада бу жаны бла иш жууукъ кезиуде ахырына жетдирилликди. Сатыу-алыуну объектлерини къоркъуусузлукъларыны юслеринден айта, Казбек Коков право низамны сакълаучуланы РФ-ни КоАП-ыны терроризмге къажау къоркъуусузлукъ жаны бла статьяларын бузгъанланы жууапха тартыргъа чакъыргъанды.
Сёз Жайны эм Урунууну эмда 1941-1945 жыллада Уллу Ата журт урушда Хорламны 76-жыллыгъын белгилеуню кюнлеринде жамауат къоркъуусузлукъну жалчытыуну юсюнден да баргъанды. Байрамланы кезиуюнде къаллай мадарла эмда жумушла толтуруллукъларыны юсюнден ич ишле министр Василий Павлов эмда культур министр Мухадин Кумахов билдиргендиле.
Культура министр айтханыча, битеу байрам жумушла Роспотребнадзорну КъМР-де Управлениясыны санитар-эпидемиология жорукъларына тийишлиликде бардырыллыкъдыла. Василий Павлов а право низамны, законлукъну сакълау жаны бла къаллай жумушла толтуруллукъларын билдиргенди.
Ахырында Казбек Коков жууаплы органлагъа буйрукъла бергенди эмда толтуруучу эм муниципал власть органланы жамауатны къоркъуусузлугъун, тынчлыгъын сакълау соруулада право низамны сакълаучу структурала бла байламлыкъда ишлерге чакъыргъанды.
