«Эльбрус» курорт кесини къыш сезонун ачханды. Озгъан солуу кюнледе Минги тауну тийресинде 2 минг чакълы турист лыжалада бла сноубордда учхандыла. Аны юсюнден бизге «Шимал Кавказны курортлары» акционер обществону пресс-службасы билдиргенди.
Быйылгъы кюз арты жылы болгъаны себепли сезонну бир кесек кечирек ачаргъа тюшгенди. Болсада трассаланы экинчи эм ючюнчю кезиулери учаргъа сюйгенлеге тап жарашдырылыпдыла.
«Курорт Эльбрус» акционер обществону таматасы Беккаланы Хыйса айтханнга кёре, трассала ташладан тазаланнгандыла, ючюнчю станцияда къарны теренлиги бюгюнлюкде 30 сантиметрге жетеди. «Шимал Кавказны курортлары» акционер обществону башчысы Хасан Тимижев а, битеу трассала да ачылмагъанларын эсге ала, туристлеге деп жангы промо-тариф къурагъанын билдиргенди. Аны бла Азаудан Гара-Башына дери канаткада кётюрюлюп, сау кюнню ичинде учууну багъасы абадан адамгъа 1600 сом боллукъду. Сабийлеге ол эки кереге учузду. Ары медицина страхования да киреди, дегенди.