РусГидро компанияны Къабарты-Малкъарда бёлюмюню специалистлери, Аушигерни ГЭС-инде гидроагрегатладан бирине тынгылы ремонт этип, ызы бла аны хайырланыргъа бергендиле. Энергетикле айтханларыча, тийишли жумушла быйыл февраль айны аллында башланнгандыла. Аланы тамамлаугъа «Гидроремонт-ВКК» предприятияны специалистлери къатышхандыла.
Быллай станциялада хар гидроагрегатны ол бир талай заманны ишлегенден сора жангыртыргъа тюшеди. Шёндюгю ремонтну кезиуюнде специалистле аны чархын, статорун, роторун, тюрлю-тюрлю аппаратларын, системаларын да жангыртхандыла. Аны бошагъандан сора агрегатны жерине элтип орнатхынчы, сынам халда ишлетип кёргендиле.
Бёлюмде айтханларына кёре, бу агрегат 2002 жылны ахырында хайырланылыргъа берилгенди. Шёндюгю тынгылы ремонтха дери ол 1,2 миллиард киловатт-сагъат электрокюч чыгъаргъанды. Этилген мадарны хайырындан станция мындан арысында да ышаннгылы ишлеп турлукъду, деп белгилегендиле РусГидрода.