КъБР-м и Iэтащхьэ КIуэкIуэ Казбек иджыблагъэ иригъэкIуэкIащ 2021 гъэм и япэ мазищым КъБР-м и Правитель­ствэм и лэжьыгъэм кърикIуахэм щы­хэп­лъэжа, апхуэдэуи республикэм щып­сэухэм хуа­щIэ къэрал, муниципальнэ Iуэхутхьэбзэхэм я фIагъым щытеп­сэ­лъыхьа зэIущIэ.
ЗэфIагъэкIа лэжьыгъэр къызэщIа­къуэжу зэхуэсым къыщыпсэлъащ ­КъБР-м и Правительствэм и УнафэщI Мусуков Алий, КъБР-м и Правительствэм и Уна­фэщIым и япэ къуэдзэ Къуныжь МуIэед, КъБР-м и Правительствэм и УнафэщIым и къуэдзэ Хъубий Марат, КъБР-м экономикэ зыужьыныгъэмкIэ и министр Ра­хаев Борис, КъБР-м узыншагъэр хъу­мэнымкIэ и министр Къалэбатэ Рустам, КъБР-м цIыхухэр егъэджэнымкIэ, щIэныгъэмрэ щIа­лэгъуалэм я IуэхухэмкIэ и министр ­Езауэ Анзор, КъБР-м лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министр Асанов Алим.
Мусуков Алий псори зэпилъыту къытеувыIащ япэ мазищым зэфIагъэкIа лэжьыгъэхэм. НаIуэ къызэрыхъуамкIэ, мэкъу­мэш IэнатIэм а зэманым къриубыдэу къыщалэжьар 2020 гъэм и апхуэдэ пIалъэм яху­зэфIэкIам хуэдиз мэхъу. Ухуэныгъэу ирагъэкIуэкIар илъэс кIуам и япэ мазищым еплъытмэ, процент 14,7-кIэ нэхъыбэщ, ап­хуэдэуи хэхъуащ розницэ сатууэ ящIми. 2021 гъэм республикэм щы­пащэнущ псори зэхэту сом мелард 23,5-м щIигъу зыхухаха инвестицэ проектиплIыр гъэзэщIэным, ­къимыдэкIэ, иджыри проектиблым щыубзыхуахэр зэ­фIэгъэкIынми щIадзэнущ. Хамэ къэралхэм сатууэ дащIащ доллар мел­уани 4,3-рэ и уасэ, ар 2020 гъэм и апхуэдэ лъэхъэнэм елъытауэ процент 13,9-кIэ нэхъыбэщ. Зыхэплъэж пIалъэм къриубыдэу республикэм нэгъуэщI хэкухэм щищар ерыскъыпхъэхэрщ, мэкъумэшхэкIхэр къы­зыхащIыкIхэрщ.
ЗэIущIэм къыщыхагъэщащ щIыналъэм дызэрыт илъэсым къэрал программэ 26-рэ зэрыщагъэзэщIэнур, псори зэ­хэту сом ­мелард 43-м щIигъу хуэзэу. Къагъэсэбэпыну мылъкум и процент 70-м щIигъур социальнэ Iуэхухэм хуозэ: цIыху­хэм защIэгъэ­къуэн, егъэджэныгъэ, узыншагъэр хъумэн IэнатIэхэм.
Республикэм и Iэтащхьэм гулъытэ хэха хуищIащ узыншагъэ IэнатIэм цIыхухэм щыхуащIэ къэрал, муниципальнэ Iуэху­тхьэбзэхэм я фIагъым хэгъэхъуэным. ­КъБР-м экономикэ зыужьыныгъэмкIэ и ­министр Рахаев Борис зэрыжиIамкIэ, УФ-м Экономикэ зыужьыныгъэмкIэ и минис­тер­ствэм цIыхухэм электроннэ IэмалкIэ хуа­-щIэ Iуэхутхьэбзэхэм я фIагъыр къэгъэ­нэIуэным хуэунэтIауэ иригъэкIуэкIа къэп­щытэныгъэхэм къызэрагъэлъэгъуам­кIэ, Къэбэрдей-Балъкъэрыр щIыналъэ­хэм я рейтингым щыдэкIуеящ, илъэс кIуам зэуэ IэнатIэ 18-кIэ и Iуэху ефIакIуэри.
- 2020 гъэм цIыхубэм псори зэхэту Iуэху­тхьэбзэу мин 923-рэ хуащIащ, ар 2019 гъэм яхузэфIэкIауэ щытам нэхърэ хуэдэ зырэ ныкъуэкIэ нэхъыбэщ. ЦIыхухэм Зыуэ щыт порталымкIэ Iуэхутхьэбзэ лIэужьы­гъуэу ­хуащIэр 200-м нэсащ. Республикэм щыпсэухэм я процент 83-м щIигъум зы­щрагъэтхащ ЕСИА-м икIи Iэмал яIэщ къэрал Iуэхутхьэбзэхэм Зыуэ щыт я порталыр къагъэсэбэпыну. КИФЩI-м хыхьэ ­щIыналъэхэр къапщтэмэ, абыкIэ бжьыпэр ­тIыгъщ, - къыхигъэщащ министрым. Абы ап­хуэдэуи жиIащ мыхьэнэшхуэ зиIэ нэ­гъуэщI Iуэхутхьэбзэ 25-ри дызэрыт илъэ­сым электроннэ мардэм хуагъэкIуэну зэ­рамурадыр. ЦIыхухэр нэхъыбэу къы­зыщIэупщIэ Iуэхутхьэбзэхэм ящыщу ­къагъэлъэгъуащ сабий пособиехэр яхуэ­гъэувынымрэ ахэр етынымрэ, пенсэхэр зэрыхъум теухуа справкэхэр тыныр, бгъэIэпхъуэ мыхъу мылъкур кадастрым ­хэгъэхьэныр, ЕГРН-м теухуа хъыбархэр ­ятхыныр, нэгъуэщIхэри.
КIуэкIуэ Казбек къызэхуэсахэм ягу къигъэкIыжащ УФ-м и Президентым Къэрал Советым и Президиумымрэ Стратегие мыхьэнэ зиIэ жэрдэмхэм я агентствэмрэ я зэIущIэу мэлыжьыхьым и 15-м иригъэ­кIуэкIам а унэтIыныгъэм гулъытэ хэха хуэ­щIын хуейуэ къалэну къызэрыщигъэувар: «къэралыр дэфтэрхэм йолэжь» ­мардэм къытекIауэ «къэралыр цIыхухэм ­ядолажьэ» жыхуиIэм хуэкIуапхъэщ икIи административнэ Iуэху хэхахэр мыхъуу, цIыхухэр махуэ къэс зыIууэхэм ятещIы­хьауэ лэжьапхъэщ. «Къэрал властым и лэжьыгъэр зыхуэдэр цIыхубэм иджыпсту къызэрилъытэр хуащIэ Iуэхутхьэбзэхэм я фIагъым елъытауэщ», - Президентым и псалъэхэм я купщIэр ­къигъэлъэгъуащ республикэм и Унафэ­щIым.
КъБР-м и Iэтащхьэм къигъэуващ лэ­жьакIуэ гуп къызэрагъэпэщыну. Абы и ­къалэну щытынури иубзыхуащ - цIыхухэм электроннэ IэмалкIэ хуащIэ къэрал, муниципальнэ Iуэхутхьэбзэхэр псынщIэу, фIагъ лъаги иIэу хуащIэным кIэлъып­лъыным, зыхуэфащэ тхылъхэр зэхуа­хьэсыну щыхуа­гъэувкIэ зыкIи зыхуэмеинухэри зэрагъэ­пэщыныр памыубыдыным, административнэ лъэпощхьэпохэр гъэ­мэщIэным я нэIэ трагъэтынырщ. КIуэкIуэ Казбек цIыхухэм Iуэхутхьэбзэ яхуэ­щIэным епха министерствэ псоми я унафэщIхэм яхуигъэуващ а унэтIыныгъэмкIэ ирагъэкIуэкI лэжьыгъэр щIагъэхуэбжьэну.
КъБР-м и Iэтащхьэ КIуэкIуэ Казбек зэIущIэм и кIэм къыхигъэщхьэхукIащ: «Лэ­жьыгъэшхуэ идогъэкIуэкI. Ауэ ныкъуса­ныгъэ, зэфIэмыхьэныгъэ мыинхэри къэв­мы­гъэхъу, абыхэм зэфIэдгъэкIахэм мы­хьэнэ ямыIэу къыщIрагъэдзынкIэ хъунущ. Гъуэгу километрищэхэр теплъхьэфынущ, ауэ абы зы кумб иIэмэ, ар псоми ялъа­гъунущ. Абы къыхэкIыуи цIыхур арэзы ­техъуэнукъым сымаджэщ нэхъыфI дыдэм и лэжьыгъэм, абы екIуалIэ цIыхум къы­щыIущIэ пэшыр зыхуей хуэмызамэ, е а ­къудамэм и къалэнхэр тэмэму имыгъэзащIэмэ. А Iуэхухэм нэхъыфIу елэжьыпхъэщ, властым зэфIигъэкIхэм цIыхухэм пщIэ ­хуащIын папщIэ».
КъБР-м и Iэтащхьэмрэ