КъМР-ни Башчысыны къуллугъун болжаллы халда толтургъан Казбек Коков Терк районда болгъанды, аны администрациясыны башчысы Муаед Дадов бла тюбешип, тийрени социал-экономика айныууну онгларын сюзгенди.Республиканы оноучусу бек алгъа Терекде налмас инструментлени заводуна барып, аны производство мекямларына къарагъанды, предприятияны башчылары эмда ишчилери бла ушакъ этгенди. Аны кезиуюнде предприятияны шёндюгю проблемалары эмда аладан къутулууну жоллары сюзюлгендиле.
Дейское элде уа Казбек Коков олимпиадалы резервли сабий-жаш тёлю спорт школну жокълагъанды, Маданият юйню ремонту къалай баргъанына къарагъанды. Бусагъатда анда къабыргъалары сюртюлюп бошалгъандыла, терезеле бла эшикле, инженер сетьле эм жылыу быргъыла алышындырылгъандыла. Актовый залны ичи  айбатландырылып бошалгъанды, котельняда ремонт да ахырына жетдирилгенди. Битеу ишле 70 процентге тамамланнгандыла. Аланы качестволарына бла объектни къурулушуну болжаллары къалай сакъланнганларына энчи эс бурулгъанды.
КъМР-ни Башчысыны къуллугъун болжаллы халда толтургъан  уллайгъан адамла бла да тюбешгенди. Аны кезиуюнде элни къыйыры бла ётерик жолну, суу бла тынгылы жалчытыуну юсюнден да баргъанды сёз. Суу жыйылыучу жангы башня ишлерге эмда быргъыла тартыргъа оноу этилгенди.
Плановскоеде уа Казбек Коков Маданият юйню бла 1-чи номерли орта школну кёре баргъанды. Ахырында  Терек шахарда ишчи  кийимле тикген  «БТК групп» фабрикада болгъанды. Анда 525 адам урунады, алай  ишчи жерлени 700-ге жетдирирге мурат барды.