|
КъБР-м и Конституцэм теухуауэ
6 апреля, 2021 - 06:47
КъБР-м и Парламентым и УнафэщI Егоровэ Татьянэ иджыблагъэ иригъэкIуэкIа зи чэзу зэIущIэм къыщаIэта Iуэхугъуэ нэхъыщхьэхэм ящыщт «Къэбэрдей-Балъкъэр Республикэм и Конституцэм халъхьэ зэхъуэкIыныгъэхэм ятеухуауэ» КъБР-м и законым и проектыр.
КъБР-м и Парламентым Законодательствэмрэ щIыпIэ унафэр зегъэкIуэнымкIэ и комитетым и унафэщI Мэлбахъуэ Борис жиIащ Урысей Федерацэм и Конституцэм халъхьэ зэхъуэкIыныгъэм и IуэхукIэ 2020 гъэм гъатхэпэм и 14-м къыдагъэкIа «Къэрал унафэр зэрызэрагъакIуэ Iуэхугъуэ щхьэхуэхэр егъэфIэкIуэным теухуауэ» УФ-м и Законым ипкъ иткIэ КъБР-м и Парламентым и УнафэщI Егоровэ Татьянэ 2020 гъэм жэпуэгъуэм и 8-м унафэ къызэрищтар КъБР-м и Конституцэмрэ республикэм и законхэмрэ халъхьэну зэхъуэкIыныгъэхэр зыгъэхьэзырыну лэжьакIуэ гупыр къызэгъэпэщыным ехьэлIауэ.
- Гупым хагъэхьащ КъБР-м и Парламентым и депутатхэр, республикэм и Iэтащхьэм и Администрацэмрэ Правительствэмрэ, щIыналъэм и прокуратурэм, Урысейм ЮстицэмкIэ и министерствэм и щIыналъэ къудамэм, КъБР-м и Конститу-цэ судым, Суд Нэхъыщхьэм, Жылагъуэ палатэм, КъБР-м цIыхум и хуитыныгъэхэр хъумэнымкIэ и уполномоченнэм и аппаратым, щIэныгъэ, жылагъуэ зэгухьэныгъэхэм я лIыкIуэхэр, - жиIащ Мэлбахъуэ Борис. - Абыхэм яхэтщ щIэныгъэ куу зыбгъэдэлъ юристхэр, къэрал, муниципальнэ, жылагъуэ лэжьыгъэм зэфIэкIышхуэ щызиIэ цIыхухэр. Апхуэдэ щIыкIэкIэ законопроектым елэжьыну зэхуэтшэсащ къэрал унафэщIхэм я мызакъуэу, жылагъуэ IуэхущIапIэхэм, щIыпIэ унафэр зехьэнымкIэ IэнатIэхэм Iутхэр, къэпщытакIуэхэр, щIэныгъэлIхэр. Къыхэзгъэщыну сыхуейт лэжьакIуэ гупым иригъэкIуэкIа зэIущIи 6-м Iуэхугъуэ 70-м щIигъу къызэрыщаIэтар.
КъБР-м и Конституцэм и 137-нэ статьям тету законым и проектыр къыхалъхьащ КъБР-м и Парламентым хэт депутатхэм я бжыгъэм и Iыхьэ щанэм щIигъум.
Мэлбахъуэм зэрыжиIамкIэ, КъБР-м и Конституцэм халъхьэ зэхъуэкIыныгъэхэр 40-м щIегъу. Ахэр хуэгъэзащ щIыналъэ политикэр, цIыхухэм я хуитыныгъэхэр къызэрызэрагъэпэщ Iэмалхэр егъэфIэкIуэным.
- ЩIыналъэм и Конституцэм и 70-нэ статьям халъхьэ зэхъуэкIыныгъэхэмкIэ ягъэбелджылы Урысей Федерацэмрэ Къэбэрдей-Балъкъэр Республикэмрэ зэрызэдэлэжьэну унэтIыныгъэхэр. Къэбэрдей-Балъкъэр Республикэм и Iэтащхьэм и къулыкъур зыхуагъэлъагъуэм хуагъэув мардэхэри нэхъ ткIий ящI. Апхуэдэу, КъБР-м и Конституцэм и 79-нэ статьям къызэрыщыгъэлъэгъуамкIэ, а къулыкъур зратыну хуитыр Урысей Федерацэм зэпымыууэ щыпсэу цIыхурщ. Къэралым и Конституцэм и 129-нэ статьям халъхьа зэхъуэкIыныгъэм, Урысей Федерацэм и щIыналъэм и прокурор къулыкъум ягъэувыным теухуауэ къэрал IэнатIэхэм емычэнджэщыныр къызыщыгъэлъэгъуам, ипкъ иткIэ республикэм и Конституцэм и 127-нэ статьяр (Къэбэрдей-Балъкъэр Республикэм и прокурорыр зэрыхах щIыкIэр къыщыхьар) хагъэкIыж.
Апхуэдэуи законопроектым тету Конституцэм хагъэкI хеящIэхэм я статусым, федеральнэ судхэм я лэжьыгъэр къызэрызэрагъэпэщым ятеухуа положенэхэр, сыту жыпIэмэ а Iуэхухэр зезыгъакIуэр федеральнэ законодательствэращ
2023 гъэм щIышылэм и 1 пщIондэ УФ-м и щIыналъэхэм я Конституцэ судхэр ягъэкIуэдыжыным теухуауэ къыдагъэкIа Федеральнэ конституцэ законым къызэригъэувым тету КъБР-м и Конституцэ Судым теухуа мардэхэр тхыгъэм хагъэкIыж.
Къэбэрдей-Балъкъэр Республикэм и Конституцэм щIыпIэ унафэр зэрызэрахьэм теухуауэ хэт положенэр зыхуей хуагъэзэж, УФ-м и Конституцэм халъхьэ зэхъуэкIыныгъэхэм теухуауэ 2020 гъэм гъатхэпэм и 14-м къыдагъэкIа УФ-м и Законым тету.
Федеральнэ законодательствэм игъуэта зэхъуэкIыныгъэхэм тещIыхьауэ республикэм и Конституцэм халъхьэ зэхъуэкIыныгъэ зыбжанэр теухуащ Къэбэрдей-Балъкъэр Республикэм и Iэтащхьэмрэ КъБР-ми Парламентымрэ я пщэрылъхэр гъэбелджылыным.
КъищынэмыщIауэ, Урысей Федерацэм и Конституцэм и 95-нэ статьям игъуэта зэхъуэкIыныгъэм ипкъ иткIэ, «УФ-м и Федеральнэ Зэхуэсым хэт» псалъэхэм «Урысей Федерацэм и сенатор» ухуэкIэр ягъуэтащ. Республикэм и законодательствэм тету законопроектыр еджэгъуищкIэ хэплъэну къыхалъхьэнущ, япэ зэIущIэр екIуэкIынущ 2021 гъэм и мэлыжьыхьым. Законопроектыр ягъэхьащ КъБР-м и Iэтащхьэм, КъБР-м и Парламентым и депутатхэм, Правительствэм, Жылагъуэ палатэм, цIыхум и хуитыныгъэхэр хъумэнымкIэ уполномоченнэм деж, апхуэдэуи Iуэхур зи нэIэм щIэтын хуей IэнатIэхэм, КъБР-м и Прокуратурэм, УФ-м ЮстицэмкIэ и министерствэм Къэбэрдей-Балъкъэрым щиIэ къудамэм.
«Къэбэрдей-Балъкъэр Республикэм и Конституцэм халъхьэ зэхъуэкIыныгъэхэм ятеухуауэ» КъБР-м и законым и проектыр республикэм и хабзэгъэув орган нэхъыщхьэм и сайтым итщ, еджэну хуейхэм зыщагъэгъуэзэну Iэмал яIэщ.
ЗэIущIэм федеральнэ законрэ жэрдэму 30-м щIигъум депутатхэр щытепсэлъы-хьащ. Ахэр хуэгъэзат УФ-м Лэжьыгъэм, ЩIым, ПсэупIэм, Псым теухуа и кодексхэм, УФ-м щыпсэухэм я узыншагъэр зэрахъумэм, лъэпкъ хъугъуэфIыгъуэу щыт IуэхущIапIэхэмрэ щIыпIэхэмрэ, щIыуэпс къэпщытэныгъэхэм, рынок Iуэхум халъхьэ зэхъуэкIыныгъэхэм.
Апхуэдэуи депутатхэм унафэ ящIащ КъБР-м и Парламентым и ЩIыхь тхылъкIэ республикэм и лэжьакIуэ нэхъ пажэхэр ягъэлъэпIэну.
КъБР-м и Парламентым и пресс-IуэхущIапIэ.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|