Къабарты-Малкъарда биринчи къырал эм муниципал жумушланы тамамлагъан кёп функциялы ара (МФЦ) ишлеп башлагъанлы тогъуз жыл болады. Андан бери аны онеки бёлюмю ачылгъанды. Бюгюнлюкде алада 600 артыкъ специалист урунады, ол санда саулукъларында бир тюрлю кемчиликлери болгъан 33 инсан. Андан сора да, 116 элде 147 специалист къармашады. Предпринимательлеге себепликге «МФЦ для бизнеса»,«Россельхозбанк» эм «Банк Нальчик» учреждениялада да къошакъ халда болушлукъ берген офисле бардыла. Саулай алып айтханда, 401 «терезеде» жамауатны 340 аслам къырал эм муниципал жумушларын тамамларча онг къуралгъанды.
Кёп функциялы арала ачылгъанлы 6 миллион бла 125 минг заявкагъа къаралгъанды, аладан 3 миллион бла 903 минг жумуш тамамланнганды. Былтырны айтханда, 1 миллион 475 минг заявка этилгенди, ол санда телефон бла сёлешип 158 минг чакълысы.
Белгилисича, арагъа келир ючюн алгъадан электрон халда жазылыргъа тийишлиди. Болсада кюн сайын клиентлени саны 4 минг адамгъа жетеди, ол а былтырдан эсе 40 процентге кёпдю. Ала залда онбеш минутдан кёп сакъламайдыла, Роспотребнадзорну жорукълары да бузулмазча аслам эс бурулады.
МФЦ-ны республиканы бюджетин байыкъландырыуда да къошумчулугъу уллуду. Сёз ючюн, былтыр бёлюмлени барысындан да 50 миллион сом файда тюшюрюлгенди. Алай бла 2015 жылдан бери 255 миллион сом къырал пошлина тёленнгенди.
Специалистле юйлеринден чыгъаргъа онглары болмагъанлагъа - сакъатлагъа, ветеранлагъа, 80 жылдан атлагъанлагъа эм башхалагъа - хакъсыз кеслери барадыла. Былтыр мартны ахырында пандемия ючюн чекле салыннганларында, ол къауумгъа 65+ жыл сандагъылада да къошулгъандыла Алай бла сагъынылгъан кезиуде аланы барысына да 1611 барыу къуралгъанды, буруннгу жылдан эсе, 46 процентге кёп.
Бусагъатда араны келечилери социальный сетьлени да тири хайырланадыла, ишчи кюнню ичинде алагъа тюрлю-тюрлю проблемала бла байламлы отуздан артыкъ соруу келеди.
Былтыр сентябрьде РФ-ни Экономиканы айнытыу министерствосу «Эм иги кёп функциялы ара» деген битеуроссей конкурсну эсеплерин чыгъаргъанды. Анга кёре Элбрус районну бёлюмю «Эм иги МФЦ» бёлюмде хорлагъанды.
