КъБР-м и Парламентым и УнафэщI Егоровэ Татьянэ иригъэкIуэкIа зи чэзу зэIущIэм депутатхэр щедэIуащ «Къэбэрдей-Балъкъэр Республикэм щыпсэу лъэпкъхэм я щэнхабзэ щIэину (тхыдэмрэ щэнхабзэмрэ я фэеплъхэр) щыт фэеплъхэм теухуауэ» КъБР-м и Законыр зэрагъэзащIэм.
«Правительствэм хухаха сыхьэтым» хыхьэу къаIэта Iуэхум тепсэлъыхьащ КъБР-м и щэнхабзэ хъугъуэфIыгъуэхэр хъумэнымкIэ и управленэм и унафэщI Гонтарь Олег. Абы жиIащ зи гугъу ящI фэеплъхэр хъума зэрыхъуну Iэмалхэм ахэр учёт щIыныр зэращыщыр, апхуэдэуи Урысей Федерацэм ис лъэпкъхэм я тхыдэ-щэнхабзэ хъугъуэфIыгъуэхэр зрагъатхэ зыуэ щыт къэрал реестрым мыхьэнэшхуэ зэриIэр.
Къэпсэлъам къыхигъэщащ Къэбэрдей-Балъкъэрым лъэпкъ щIэину, тхыдэмрэ щэнхабзэмрэ я фэеплъу куэд дыдэ зэрыщыIэр. Апхуэдэу УФ-м ис лъэпкъхэм я щэнхабзэ хъугъуэфIыгъуэхэр зэгъусэу зратхэ къэрал реестрым хагъэхьащ ди щIыналъэм щыIэ фэеплъ 417-рэ. Абыхэм ящыщу 114-м федеральнэ мыхьэнэ яIэщ.
Гонтарь Олег жиIащ щIэинхэм я теплъэм иджыпсту арэзы укъызэрищIыр, ауэ языныкъуэхэми хъума хъун папщIэ елэжьын зэрыхуейр.
- Апхуэдэщ, псалъэм папщIэ, Джабоев пщыхэм я быдапIэр, «Абай-Кала», «Ак-Кала» хъумапIэ чэщанэхэр, Iэмырхъанхэрэ Балкаруковхэрэ я чэщанэхэр, «Зылга», «Усхур» быдапIэхэм къахэнахэр, Ленин Владимир и ныбжьэгъу пэжу щыта Лепешинскэ Ольгэрэ Пантелеймонрэ 1921 гъэм щыпсэуа, щылэжьа унэр, Фадеев Александр «Разгром» романым щелэжьу 1925 - 1926 гъэхэм зыщIэса унэр, нэгъуэщIхэри, - жиIащ къэпсэлъам.
Щэнхабзэ хъугъуэфIыгъуэхэр зэрахъумэм кIэлъыплъу IуэхущIапIэм Iуэхугъуи 112-рэ иригъэкIуэкIащ. КъыщIагъэща ныкъусаныгъэхэм ятеухуа тхыгъэхэри судым ягъэхьащ. КъищынэмыщIауэ, археологие лэжьыгъэхэм япкъ иткIэ, фэеплъ 29-рэ реестрым хагъэхьэну унафэ къащтащ.
Яхъумэн хуейуэ 2020 гъэм щэнхабзэ фэеплъ 35-рэ ягъэбелджылащ, 2021 гъэм - 97-рэ. Къэпсэлъам къызэрыхигъэщамкIэ, щIыуэпсри цIыхури зэрыхэIэбэм я зэран йокI щэнхабзэ фэеплъхэм я нэхъыбэм. Дунейм апхуэдизкIэ псынщIэу ухуэныгъэщIэхэр къыщоунэхури, апхуэдэ хъугъуэфIыгъуэхэр хъума хъун щхьэкIэ я гъунапкъэхэр къэгъэлъэгъуэн хуейщ. АрщхьэкIэ тхыдэ-щэнхабзэ къэхутэныгъэхэр ебгъэкIуэкIыным мылъкушхуэ токIуадэ, ар зэкIэ хухахыфыркъым. Къэрал дэфтэркIэ щыхьэт темыхъуауэ апхуэдэ фэеплъхэр хъумэныр къыпхузэгъэпэщыныр фIэщщIыгъуейщ.
Гонтарь Олег жиIащ «Къэбэрдей-Балъкъэрым и щэнхабзэ» къэрал программэм и «ЩIэин» гуэдзэным хыхьэу, 2020 гъэм республикэм и бюджетым сом мин 11363,7-рэ къызэрыхагъэкIар. Абы щыщу сом мини 3000-р хухахащ тхыдэм и фэеплъхэм къэралым и нэIэ зэрытригъэтыну Iуэхум.
Гугъуехь яIэхэм къыщытеувыIэм, Гонтарь псом япэу къыхигъэщащ а Iуэхум пыщIауэ щIэныгъэ зиIэ IэщIагъэлIхэр зэрахуримыкъур, щэнхабзэ хъугъуэфIыгъуэхэр зыбгъэдэлъхэмрэ ахэр къэзыгъэсэбэпхэмрэ пщэрылъ щащIхэр тэмэму зэрамыгъэзащIэр, фэеплъхэр хъумэнымкIэ IэнатIэхэм емычэнджэщауэ муниципалитетхэм щIы Iыхьэхэр зэрыхухахыр. КъищынэмыщIауэ, гугъуехьхэм ящыщщ бэджэндырылажьэхэм тхыдэ щIэину къалъыта хэщIапIэхэм я теплъэр яхъуэж зэрымыхъунур къазэрыфIэмыIуэхур.
КъБР-м и Парламентым и УнафэщI Егоровэ Татьянэ щIэупщIащ УФ-м «Щэнхабзэм зегъэужьын» и къэрал программэм республикэр хэтыну дэфтэрхэр илъэс къэс игъэхьэзырми абы зэи щIыхэмыхуэм и щхьэусыгъуэм.
Гонтарь Олег жиIащ программэм хэтыну иужьрейуэ ягъэхьэзыра дэфтэрыр (2020 гъэм) щIыкIуэцIрымыкIар ахъшэр ямыуха IуэхущIапIэхэм зэрыхухагъэкIар зэрыарар, ауэ мы зэманым а Iуэхум зэрелэжьыр.
Егоровэм жиIащ щэнхабзэ хъугъуэфIыгъуэхэр зэрахъумэм теухуа норматив актхэр зэрызэхэгъэувапхъэр. Апхуэдэуи ар щIэупщIащ лицензэ зиIэ IэщIагъэлIхэмрэ IуэхущIапIэхэмрэ жьы хъуа фэеплъхэр зыхуей зэрыхуагъэзэж щIыкIэм.
Гонтарь Егоровэ Татьянэ арэзы дэхъуащ, IэщIагъэлIхэр ирикъуу зэрамыIэмкIэ, абы щыгъуэми тепсэлъыхьащ Къэбэрдей-Балъкъэр къэрал университетым и лэжьакIуэхэм я IуэхущIафэхэм. Абы зэрыжиIамкIэ, щэнхабзэ хъугъуэфIыгъуэхэр зыбгъэдэлъхэр е апхуэдэхэр къэзыгъэсэбэпхэр еджапIэ нэхъыщхьэм и IэщIагъэлIхэм ечэнджэщыжа нэужьщ управленэм абыхэм ехьэлIауэ дэфтэрыр щигъэхьэзырыр. Гонтарь жиIащ къагъэсэбэпыну мурад ящIа щIы Iыхьэхэм щэнхабзэ мыхьэнэ яIэмэ къыщащIэнур IуэхущIапIэм зыкъыхуагъэза зэрынэужьыр, нэгъуэщI хэкIыпIэ абы зэримыIэр.
Депутатхэр тепсэлъыхьащ Бахъсэн районым щрагъэкIуэкIа археологие къэхутэныгъэхэм кърикIуахэми.
КъБР-м и Парламентым и комитетым и унафэщI Къумал Заурбэч жиIащ гугъуехьхэр зэгъусэу, зэщхьэщыхауэ зэрызэфIагъэкIыпхъэр, псом хуэмыдэу фэеплъхэр хъумэным ахъшэ хухегъэхыным гулъытэ зэрыхуэщIыпхъэр, щIэныгъэ зиIэ IэщIагъэлIхэр къызэрешэлIапхъэр, муниципальнэ районхэм ябгъэдэлъ щIы Iыхьэхэм я гъунапкъэхэр гъэбелджылын зэрыхуейр.
ЗэIущIэм щыжаIар къэлъытауэ, КъБР-м и Парламентым и Президиумым и унафэр къащтащ. КъБР-м и щэнхабзэ хъугъуэфIыгъуэхэр хъумэнымкIэ и управленэм пщэрылъ щащIащ къэрал кIэлъыплъыныгъэр нэхъ ткIий ищIыну. КъБР-м ЩIы Iуэхухэмрэ мылъку зэхущытыкIэхэмкIэ и министерствэм зэфIигъэкIын хуейщ щIыналъэ мыхьэнэ зиIэ щэнхабзэ фэеплъхэр уней щIыным ехьэлIа лэжьыгъэхэр.
Апхуэдэуи щIыпIэ унафэр зезыхьэ IэнатIэхэм пщэрылъ щащIащ Iуэхугъуэ зэмылIэужьыгъуэкIэ къагъэсэбэпыну къащтэ щIы Iыхьэхэр ятын ипэ управленэм ечэнджэщыну, апхуэдэуи республикэм щрагъэкIуэкI археологие къэхутэныгъэхэм кIэлъыплъын зэрыхуейр къыхагъэщащ, щэхуу «къыщIэзытIыкIхэр» щымыIэн щхьэкIэ.