|
КIуэкIуэ Казбек хэтащ Балъкъэр театрыр къызэрызэIуахыжым иращIэкIа гуфIэгъуэ дауэдапщэхэм
30 марта, 2021 - 06:45
КъБР-м и Iэтащхьэ КIуэкIуэ Казбек хэтащ Кулиев Къайсын и цIэр зезыхьэ, къызыхуэтыншэу зэрагъэпэщыжа Балъкъэр къэрал драмэ театрыр къызэрызэIуахыжым иращIэкIа гуфIэгъуэ зэхыхьэм. А махуэ дыдэм театрым и утыкум къихьэри, и лэжьыгъэм пищэжащ «Балкария» къэрал IуэрыIуатэ-этнографие къэфакIуэ ансамблым.
ГуфIэгъуэ зэхуэсым кърихьэлIащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, УФ-м и Президентым и полномочнэ лIыкIуэу КИФЩI-м щыIэм и аппаратым КъБР-м къегъэщIылIа и федеральнэ инспектор нэхъыщхьэ Мэкъуауэ Тимур, УФ-м и Федеральнэ Зэхуэсым и Къэрал Думэм и депутатхэу Геккиев Заур, Щхьэгуэш Адэлбий, Быф Анатолий, Налшык къалэ округым и щIыпIэ администрацэм и Iэтащхьэ Ахъуэхъу Таймураз, щэнхабзэ, жылагъуэ зэгухьэныгъэхэм я лIыкIуэхэр.
Къызэхуэсахэм защыхуигъазэм КъБР-м и Iэтащхьэ КIуэкIуэ Казбек къыхигъэщащ Балъкъэр къэрал драмэ театрыр зэгъэпэщыжыным ехьэлIа лэжьыгъэхэр зэфIэкIауэ ар къызэрызэIуахыжымрэ Балъкъэр лъэпкъым и къэщIэрэщIэжыныгъэм и махуэр щагъэлъапIэмрэ зэрызэрихьэлIар нэщэнэфIу зэрыщытыр. «Балъкъэр лъэпкъым гузэвэгъуэшхуэр къызэрытепсыхэрэ зэман дэкIащ икIи захуагъэми гъуэгу игъуэтыжащ. Пэжщ, зыри пщыгъупщэжыркъым. Дэ зэи дигу ихунукъым мы гуфIэгъуэ махуэхэр зымылъагъуу дунейм ехыжахэр. Апхуэдэу щытми, нобэ, Балъкъэр лъэпкъым и къэщIэрэщIэжыныгъэм и махуэм, дэ и гугъу дощI Къэбэрдей-Балъкъэрым и къэкIуэнум, Къэбэрдей-Балъкъэр Республикэм и щIыналъэм щыпсэу лъэпкъхэм я къэкIуэнум. Шэч къытесхьэркъым мы IуэхущIапIэр Къэбэрдей-Балъкъэрым ис лъэпкъхэм я щэнхабзэм нэхъри зегъэужьыным хуэгъэпса центр дэгъуэ зэрыхъунум», - къыхигъэщхьэхукIащ КIуэкIуэ Казбек.
Республикэм и Iэтащхьэм ухуакIуэхэми театрыр къызыхуэтыншэу зэгъэпэщыжыным хэлIыфIыхьа псоми фIыщIэ яхуищIащ. Унэр ещIапхъэ къамыгъанэу сыт и лъэныкъуэкIи зыхуей хуагъэзащ, ар иджырей макъамэ IэмэпсымэхэмкIэ, утыкур, пэшхэр къызэрагъэнэхухэмкIэ къызэрагъэпэщащ. Унэ щIыбри ирагъэфIэкIуащ, утыкур нэхъ ин ящIащ, актёрхэр утыку къызэрихьэ щыгъынхэр щад, декорацэхэр щащI лъэщапIэхэри а Iуэхухэм нэхъ хуэщIа хъуащ, шэнтжьеищIэхэр къащэхуащ, репетицэхэр щрагъэкIуэкI пэшхэми къыхагъэхъуащ. Зыкъагъэлъэгъун ипэкIэ артистхэм сэхусэплъ щыхалъхьэ пэшхэм я бжыгъэри нэхъыбэ хъуащ, абыхэм а Iуэхум теухуауэ зыхуэныкъуэну псори щIэтщ.
Артистхэми фIыщIэ гуапэ яхуищIу захуигъэзащ КIуэкIуэ Казбек: «Фэ фи творчествэмкIэ цIыхухэм Iэмал явот балъкъэр лъэпкъым и щэнхабзэм и куупIэм зыщагъэгъуэзэнымкIэ. Фэ Къэбэрдей-Балъкъэрым и щIыхьыр урысей утыкум и закъуэкъым щыфIэтыр, атIэ дунейм и нэгъуэщI щIыпIэхэми ар щывогъэлъапIэ, абы папщIи си гум къыбгъэдэкIыу фIыщIэ фхузощI».
Балъкъэр театрымрэ «Балкария» ансамблымрэ япэу утыкущIэм къихьэным и пэ къихуэу къэпсэлъащ Къэбэрдей-Балъкъэрым и усакIуэ щэджащэ Кулиев Къайсын и щхьэгъусэ Кулиевэ Элизат. Абы къыхигъэщащ Балъкъэр театрыр къызэрызэIуахыжам Къэбэрдей-Балъкъэрым и щэнхабзэм дежкIэ мыхьэнэшхуэ зэриIэр, театрым и теплъэщIэм хуабжьу зэрыщыгуфIыкIыр икIи республикэм и Iэтащхьэм фIыщIэ хуищIащ театрыр зэгъэпэщыжыным езым и щхьэкIэ хэлъхьэныгъэшхуэ зэрыхуищIам папщIэ, балъкъэр лъэпкъым и щэнхабзэ хъугъуэфIыгъуэхэм къэкIуэну щIэблэхэри щыгъэгъуэзэным ар зэрыхуэщхьэпэнури жиIащ.
КъБР-м и Iэтащхьэмрэ Правительствэмрэ я пресс-IуэхущIапIэ.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|