КъМР-ни Башчысыны къуллугъун болжаллы халда толтургъан Казбек Коков КъМР-ни Правительствосуну къаууму, районланы бла шахар округланы администрацияларыны таматалары бла кезиулю кенгешни бардыргъанды. Анда сёз жер-жерли бюджетлени толтурууну, миллет проектлени регион кесеклерин къурауну юсюнден баргъанды эмда энергоресурсла ючюн тёлеуле не халда болгъанларына къаралгъанды.
Сюзюлген темагъа кёре КъМР-ни Правительствосуну Председатели Мусукланы Алий, КъМР-ни Правительствосуну Председателини биринчи орунбасары Мурат Керефов, КъМР-ни Правительствосуну Председателини орунбасары – инфраструктура эмда цифралы айныуну министри Владимир Болотоков сёлешгендиле. Кенгешге дагъыда «Газпром Межрегионгаз Нальчик» ООО-ну баш директору Александр Цыплухин, «Каббалкэнерго» АО-ну оноучу директоруну къуллугъун толтургъан Муаед Канаметов къатышхандыла.
Жууукъ заманда тамамларгъа керек боллукъ ишлени араларында билим бериу, саулукъ сакълау, культура эмда спорт объектлени талайын къурулушларын ахырына жетдириу, жолланы бла транспортну, оператив службаланы къыш кезиуге хазырлыкъларын тинтиу, шахарлада бла элледе тазалыкъны жалчытыу артыкъда магъаналыгъа саналгъандыла.
Алайды да, Нарткъалада, Ташлы-Талада, Прохладныйде, Аргуданда, Акъ-Сууда школланы, сабий садланы, спорт комплекслени ишлеу эмда жангыртыу, юйлени арбазлары, адамла солугъан жерлени тапландырыу, республиканы районларында онбир маданият юйге бла адамла солугъан арагъа тынгылы ремонт этиу ишле бошала турадыла.
Хайырланылгъан энергоресурсла ючюн жыйылгъан борчну тёлеуге энчи эс бурулгъанды. Тийишли мадарланы хайырындан газ, ток ючюн хакъны тёлеу игиленнгенди. Быйылны башындан бери ол жаны бла кёрюмдюле 77,7 эмда 91,6 процентге жетгендиле. Республикалы эмда жер-жерли бюджетледен ахча бла жалчытылыннган учрежденияла газ, ток ючюн да заманында эмда толусунлай тёлейдиле.
Алай, саулай алгъанда, Къабарты-Малкъарда ол жаны бла халны иги жанына толусунлай тюрлендирирге алыкъа къолдан келмегенди. Жылыу эмда электроэнергия бла жалчытхан мюлклени ырысхы онглары осаллай къалады, оборудованиялары, сетьлери бек тозурагъандыла. Бёлюмге тынгылы инновациялы эмда инвестиция проектле керек болуп турадыла.
Жыйылыуда Правительствону къауумуна, администрацияланы башчыларына, «Газпром межрегионгаз Нальчик» ООО-ну эмда «Каббалкэнерго» АО-ну оноучуларына ЖКХ-ны системасын аз-аздан жангырта барыуну къыйматлы амалларын табаргъа, республиканы халкъы хайырланнган энергоресурсланы ёлчемлерин болгъанларындан эсе кёп кёргюзтген кезиулени болдурмазгъа, мардаланы бла тёлеулени ачыкъ болууларын жалчытыргъа кереклиси къаты эсгертилгенди.
Бу бёлюмлеге оноу этген башчыланы араларында ишлерин тийишлисича бардырмагъанлагъа жумушакълыкъ этиллик тюйюлдю,деп чертгенди Коков.
Россейни Президентини «Россей Федерацияны 2024 жылгъа дери айнытыуну миллет эмда стратегия борчларыны юсюнден» Указын толтуруу жаны бла не иш бардырылгъаныны юсюнден КъМР-ни Правительствосуну Председателини биринчи орунбасары Мурат Керефов билдиргенди. Ол айтханнга кёре, толтуруучу власть органланы 12 миллет проектни регион кесеклерин хазырлау жаны бла ишлери белгиленнгендиле. КъМР-ни Башчысында Стратегиялы план салыу эмда миллет проектле жаны бла советни къаууму эмда болуму къабыл кёрюлгендиле, хар бёлюмге кёре ишчи группала да къуралгъандыла.
Казбек Коковну буйругъу бла республиканы министерстволары бла ведомстволары толтуруучу властьны миллет проектле ючюн жууаплы болгъан федерал органлары бла байламлыкъда ишлейдиле.
Ахырында республиканы оноучусу миллет проектлеге къатышыу – республиканы халкъыны жашау къолайлыгъын игилендириуде алгъа уллу атлам этерге онг берлик магъаналы амал болгъанын айырып айтханды.
