КъБР-м лэжьыгъэ IуэхукIэ щыIащ Урысейм экономикэ зыужьыныгъэмкIэ и министрым и къуэдзэ Назаров Сергей.
КъБР-м и Iэтащхьэ КIуэкIуэ Казбекрэ Назаров Сергейрэ абы щIыгъу хьэщIэхэмрэ щыIащ Iуащхьэмахуэ лъапэ и зыгъэпсэхупIэхэм икIи щIыналъэм и турист ухуэныгъэхэр я лэжьыгъэм зэрыхуэщIам зыщагъэгъуэзащ, а Iуэхум зегъэужьынымкIэ щыIэ хэкIыпIэхэм тепсэлъыхьащ.
КIапсэ гъуэгукIэ Гарабаши станцым нэс дэкIуеящ, иужькIэ ратракхэм итIыс-хьэри, метр 3912-рэ лъагапIэм щаухуа «Липрус» хьэщIэщым нэс кIуащ. ХьэщIэхэм яфIэтелъыджэу Iуащхьэмахуэ зыщаплъыхьащ.
ЗыгъэпсэхупIэм и зэ-фIэкIхэм зыщыщагъэгъуазэм тепсэлъыхьащ «Iуащхьэмахуэ» Урысейпсо турист-рекреацэ щIыпIэм зегъэужьыным хуэгъэпса Iуэхухэм. Абы хохьэ «Мир» станцым щащIыну кIапсэ гъуэгуитIымрэ лыжэ къежэхыпIищымрэ я ухуэныгъэхэр дызэрыт илъэсым къегъэжьэныр.
Назаров Сергей жиIащ «Iуащхьэмахуэ» зыгъэпсэхупIэм зегъэужьынымкIэ IэмалыфI дыдэхэр зэрыщыIэр, ар иужьрей илъэсхэм цIыху куэдым зыщагъэпсэху щIыпIэ, бгы лыжэ спортым, альпинизмэм дихьэххэм я кIуапIэ зэрыхъуар. Илъэс къэс хохъуэ республикэм туристу къакIуэм я бжыгъэм икIи къыхигъэщащ ар щIыналъэм инвестицэхэр къыхалъхьэнымкIэ лъабжьэ хъарзынэу зэрыувынур. А унэтIыныгъэм зригъэужьыну и мурадщ УФ-м и Правительствэм: «Iуащхьэмахуэ» зыгъэпсэхупIэм илъэс гъунэгъухэм къыхуаутIыпщынущ федеральнэ бюджетым щыщ сом меларди 7-м щIигъу.
Iуащхьэмахуэ лъапэ щрагъэкIуэкIа зэIущIэм хэтащ КъБР-м и Правительствэм и УнафэщI Мусуков Алий, абы и япэ къуэдзэ Къуныжь МуIэед, Iуащхьэмахуэ щIыналъэм и щIыпIэ администрацэм и Iэтащхьэ Залиханов Къанщобий, «Кавказ Ищхъэрэм и зыгъэпсэхупIэ-хэр» АО-м и генеральнэ директор ТIымыжь Хьэсэн, «Iуащхьэмахуэ» зыгъэпсэхупIэ» АО-м и генеральнэ директор Беккаев Хьисэ.
Налшык къэкIуэжри, КIуэкIуэ Казбекрэ Назаров Сергейрэ ирагъэкIуэкIащ щIыналъэм социально-экономикэ и лъэныкъуэкIэ зегъэужьыным теухуа зэIущIэ.
КIуэкIуэ Казбек къэрал министерствэм къикIахэм фIыщIэ яхуищIащ щIыналъэм и экономикэм гулъытэ къызэрыхуащIым папщIэ. Абы къыхигъэщащ иужь-рей илъэситхум республикэм зыщызыплъыхьыну къакIуэхэм я бжыгъэр хуэдитIкIэ нэхъыбэ зэрыхъуар, къахуеблагъэхэм Iуэхутхьэбзэу хуащIэми хуэди 2,8-кIэ зэрыхэхъуар. А псор къэлъытауэ, республикэм къыпэщытщ илъэс хъурейм къриубыдэу цIыхухэм зыщагъэпсэхуфын хуэдэу лэжьыгъэр зэтеухуэныр. Абы ипкъ иткIэ къэув къалэн- хэм я нэхъыщхьэщ инфраструктурэм зегъэужьынымрэ инвесторхэр къыдэхьэхынымрэ.
Назаров Сергей къыхигъэщащ инфраструктурэм зегъэужьын и лъэныкъуэкIэ республикэм дэлэжьэным мыхьэнэшхуэ зэриIэр. ЗэIущIэм хэтхэр нэхъ тегъэчыныхьауэ къытеувыIащ зыгъэпсэхупIэм псы ешэлIэным, къагъэсэбэпар къыIушыным теухуа проектхэр зэхэлъхьэным, электрокъарукIэ къызэрызэгъэпэщари егъэфIэкIуэн зэрыхуейм. Зытепсэлъыхь Iуэхухэм ящыщу и гугъу ящIащ УФ-м «Кавказ Ищхъэрэ федеральнэ щIыналъэм зегъэужьыныр» и къэрал программэр гъэзэщIа зэрыхъум. Абы хыхьэу 2018 - 2020 гъэхэм ягъэзэщIащ инвестицэ проектипщI, псори зэхэту сом меларди 3,5-рэ хуэзэу. А программэм зэрыщыубзыхуамкIэ, накъыгъэм ирихьэлIэу лажьэу яутIыпщынущ Къэщкъэтау - Аушыджэр псы кIуапIэр, мэкъуауэгъуэм и пэ къихуэу яухыну я мурадщ Бахъсэн къалэ округым псы къыщIэшыпIэ щыухуэныр.
Илъэситху гъунэгъум инвестицэ проектхэр щагъэзэщIэну я мурадщ республикэм и мэкъумэш IэнатIэм, туризмэм, промышленностым. Инвестицэ лэжьыгъэхэр нэхъ жыджэру зэрырагъэкIуэкIыр наIуэщ икIи абы къыхэкIыу инвестицэ проектхэр дэIыгъыныр УФ-м Экономикэ зыужьыныгъэмкIэ и министерствэмрэ щIыналъэ властхэмрэ зэрызэдэлэжьэну унэтIыныгъэ нэхъыщхьэхэм ящыщу яубзыхуащ.
ЗэIущIэм хэтащ КъБР-м и Правительствэм и УнафэщI Мусуков Алий, абы и япэ къуэдзэ Къуныжь МуIэед, КъБР-м экономикэ зыужьыныгъэмкIэ и министр Рахаев Борис, КъБР-м курортхэмрэ туризмэмкIэ и министр ЩоджэнцIыкIу Мурат, Бахъсэн къалэ округым и щIыпIэ администрацэм и Iэтащхьэ Мамхэгъ Хьэчим, «Кавказ Ищхъэрэм и зыгъэпсэхупIэхэр» АО-м и генеральнэ директор ТIымыжь Хьэсэн, «Iуащхьэмахуэ» зыгъэпсэхупIэ» АО-м и генеральнэ директор Беккаев Хьисэ, УФ-м Экономикэ зыужьыныгъэмкIэ и министерствэм зытепсэлъыхь Iуэхур зэхьэлIа и департаментхэм я унафэщIхэр.