КъМР-ни Парламентини президиумуну кезиулю жыйылыуунда депутатла «КъМР-де стратегиялы план салыуну юсюнден» республикалы законну сюзгендиле. Ол 2014 жылда 28 июньда чыгъарылгъан 172-ФЗ номерли Федерал законну излемлерине тийишлиликде жарашдырылгъанды. «Документде республикада стратегиялы планны толтургъанда, бу жаны бла документлени жашауда бардыргъанда жюрютюлген жорукъла белгиленипдиле», - деп ангылатханды Экономика, инвестицияла эм предпринимательство жаны бал комитетни башчысы Заур Апшев.
«КъМР-де кёп къатлы юйледе жашагъанла бирге хайырланнган мюлкге тынгылы ремонт этиуню юсюнден» республикалы законнга кийирирге деп белгиленнген тюзетиулеге да къаралгъанды. Ол РФ-ни Жашау журт кодексине келиширча этилгенди.  Проектле сюзюлгенден сора Парламентни жыйылыуунда да тинтилликдиле.
Дагъыда федерал законланы проектлерине, РФ-ни субъектлеринде законла чыгъарыучу органланы башламчылыкъларына да къаралгъанды. Алада сёз РФ-ни Административ право бузукълукъланы кодексине тюзетиулени, предприятияла тамамлагъан бир-бир жумушланы правогъа келиширча этиуню юслеринден барады.
Президиум Нальчикни администрациясында физкультура, спорт эм жаш тёлюню ишлери жаны бла управленияны башчысыны орунбасары Ладин Апшевни, Республикалы больницаны бёлюмюню башчысы Аслан Тутуковну Парламентни Сыйлы грамотасы бла саугъаларгъа оноу этгенди.
Жыйылыуда башха соруулагъа да къаралгъанды.