|
ЛIыхъужьхэм я пщIэр кIуэдыркъым
25 февраля, 2021 - 07:40
Хэкум и хъумакIуэм и махуэм ирихьэлIэу КъБР-м и Правительствэм и Унэм мазаем и 23-м гъуфIэгъуэ зэIущIэ щекIуэкIащ. Хэку зауэшхуэм хэтахэм я Iыхьлыхэм иратыжащ зауэлIхэм къыхуагъэфэщауэ щыта, ауэ яIэрымыхьэжа орденхэмрэ медалхэмрэ щыхьэт техъуэ тхылъхэр.
Апхуэдэхэр къэхутэжыным илъэс зыбжанэ хъуауэ лэжьыгъэшхуэ ирахьэлIэ КъБР-м щыIэ къэрал налог IэнатIэм и налог инспектор нэхъыщхьэ Нэхущ Iэдэмрэ абы ипхъу КъБКъУ-м ПравэмкIэ, экономикэмрэ финансхэмкIэ институтым и магистратурэм и япэ курсым щеджэ Дианэрэ.
ГъуфIэгъуэ зэIущIэр къызэIузыха КъБР-м и Iэтащхьэ КIуэкIуэ Казбек ехъуэхъуащ къэралым и шынагъуэншагъэр къызэзыгъэпэщхэм я махуэмкIэ.
-Урысейм IэщэкIэ ЗэщIэузэда и Къарухэм и ветеранхэмрэ нобэ я къалэн ягъэзащIэу ди Хэкур зыхъумэхэмрэ фIыщIэ ин яхузощI, - захуигъэзащ къызэхуэсахэм КъБР-м и Iэтащхьэм. - Псом хуэмыдэу къыхэгъэщыпхъэщ ветеранхэр, фэеплъ мыухыж яхуэфащэщ къэралым и щхьэхуитыныгъэр хъумэным зи гъащIэр щIэзытахэм. Къэбэрдей-Балъкъэрым щыщу Хэку зауэшхуэм я псэр щатащ цIыху мин 40-м нэблагъэм. Си фIэщ мэхъу, къыдэкIуэтей щIэблэм ахэр я щапхъэу зэрыщытынур. Нобэ мы пэшым щыттыжынущ Хэку зауэшхуэм хэтахэм яIэрымыхьэжа орденхэмрэ медалхэмрэ щыхьэт техъуэ тхылъхэр. Ди жагъуэ зэрыхъущи, абыхэм ящыщ куэдыр щыгъуэзэну хунэсакъым къэралым къахуищIа пщIэ лъагэм. Иужьрей илъэсхэм къриубыдэу ди деж лэжьыгъэшхуэ щокIуэкI зауэм и лIыхъужьхэм я цIэр къэIэтыжыным теухуауэ. Дэ тлъэкI къэдгъэнэнукъым абыхэм я цIэр фэеплъ мыужьыжу ди тхыдэм хэтхэжа хъуным ехьэлIауэ.
Псори зэхэту зэIущIэм щатыжащ дамыгъи 100-м щыхьэт техъуэ тхылъхэр. Абыхэм яхэтщ Бэракъ Плъыжь орденым, I нагъыщэ зиIэ Хэку зауэшхуэм и орденым, Вагъуэ Плъыжь орденым, «И хахуагъэм папщIэ», «Сталинград зэрахъумам папщIэ», «Ленинград зэрахъумам папщIэ», «Кавказыр зэрахъумам папщIэ», «Совет Заполярьер зэрахъумам папщIэ», «1941 - 1945 гъэхэм екIуэкIа Хэку зауэшхуэм Германием зэрыщытекIуам папщIэ» медалхэм я удостоверенэхэр. А тыгъэ лъапIэхэр иджы фэеплъу къахуонэ зыхуагъэфэщауэ щытахэм я щIэблэм.
ЗэIущIэм кърагъэблэгъат лIыхъужьхэм я бынхэр, къуэрылъху-пхъурылъхухэр. «Сталинград зэрахъумам папщIэ» медалыр зыхуагъэфэщауэ щыта лейтенант нэхъыжь Лыджыдэ Джабар и дэфтэрыр къратыжащ абы и къуэ Владимир, «Сталинград зэрахъумам папщIэ», «Кавказыр зэрахъумам папщIэ» медалхэр зыхуагъэфэщауэ щыта зауэлI ЛIуп Данил и дэфтэрхэр къыIэрыхьэжащ абы и къуэ Нурхьэлий, нэгъуэщIхэми.
Къэхутэныгъэ лэжьыгъэхэр егъэкIуэкIын щыщIадза 2015 гъэм и мазае лъандэрэ Хэкум и хъумакIуэ 250-м щIигъум я кIуэдыкIар наIуэ ящIащ. КъищынэмыщIауэ, къэрал тыгъэ 312-рэ къахутэжри, сэлэтхэм я унагъуэхэм Iэрагъэхьэжащ.
ЗэIущIэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэм и Аппаратым КъБР-м къегъэщIылIа и федеральнэ инспектор нэхъыщхьэ Мэкъуауэ Тимур, Зауэм, лэжьыгъэм, IэщэкIэ ЗэщIэузэда Къарухэм, хабзэхъумэ органхэм я ветеранхэм (пенсионерхэм) я Къэбэрдей-Балъкъэр жылагъуэ зэгухьэныгъэм и тхьэмадэ Шыхъуэбахъуэ Мухьэмэд, Къэрал Думэм и депутат Геккиев Заур сымэ.
ГуфIэгъуэ зэIущIэм и кIэухыу кърихьэлIахэм фэеплъ сурэт зытрагъэхащ.
|
17.04.2024 - 16:08 Мэлыжьыхьым и 5 - 9-хэм Анапэ къалэм щекIуэкIащ Урысей МВД-м IэпщэрыбанэмкIэ и чемпионат. Абы япэ увыпIэр къыщихьащ КъБР-м щыIэ МВД-м и гупым. |
|
17.04.2024 - 16:05 «Тхыдэ мыхьэнэ зиIэ щIыпIэхэр дывгъэхъумэ» къыхуеджэныгъэм щIэту а махуэр гъэ къэс гъэлъэпIэным теухуа унафэр 1982 гъэм ЮНЕСКО зэгухьэныгъэм Фэеплъхэмрэ щIыпIэ хьэлэмэтхэмрэ хъумэнымкIэ и дунейпсо |
|
17.04.2024 - 09:01 Къэбэрдей-Балъкъэр, Къэрэшей-Шэрджэс, Адыгэ, Ингуш, Осетие Ищхъэрэ - Алание республикэхэм я цIыхубэ артист, «Адыгейм и ЩIыхь» медалыр зыхуагъэфэща уэрэджыIакIуэ цIэрыIуэ Нэхущ Чэрим иджыблагъэ къра |
|
17.04.2024 - 09:01 Котляровхэ Мариерэ Викторрэ я тхылъ тедзапIэм къыщыдэкIащ дунейм щыцIэрыIуэ бзылъхугъэ Хьэгъундокъуэ Елмэсхъан теухуа «Черкешенка» тхылъыр. |
|
17.04.2024 - 09:00 Астрономхэм къызэрахутауэ, ди Дыгъэм хуэдгъэдэну нэхъ тпэгъунэгъуу уахэм зыщызыгъазэр вагъуищу зэхэт Альфа Центаврэ гуэрэным хыхьэ Проксимэ Центаврэщ. |
|