КъМР-ни Парламентинде Жаш тёлю палатаны бешинчи чакъырылыууну болжалы бошалып, аны жангы къауумуна жаш депутатланы айырыу башланнганды. Эки кюнню ичинде эксперт комиссия, анга уа депутатла, устазла, жамауат къуллукъчула, журналистле да киргендиле,  анга къошулургъа сюйгенлени проектлерине тынгылап, айырмалыланы сайлагъандыла.
Эсигизге салайыкъ, Жаш тёлю палата эки жылгъа айырылады, быйыл а республиканы законла чыгъарыучу органында бу жаш тёлю къауум къуралгъанлы он жыл толлукъду. Ол кенгешчи органды, аны баш борчу - жаш тёлю политика бла байламлы башламчылыкъла этергеди.
Кеси да 45 жаш депутатдан къуралады, быйыл а анга 58  адамдан тилек  келгенди. Ала, тёреде болуучусуча, жаш тёлю организацияланы,  районлада жер-жерли власть органлада жаш тёлю политика жаны бла кенгешчи органланы, политика партияланы регион бёлюмлерини, бийик эм орта профессионал билим берген учреждениялада студент советлени келечилери эдиле. Аладан 55-си  къабыл кёрюлгенди. Документлени кёргюзтгенлени жартысындан асламы биринчи кере сайланадыла.
Алай бла палатагъа къошулургъа сюйгенлеге беш минутну ичинде кеслерини юслеринден айтыргъа, бери къаллай муратла бла келгенлерин, къаллай проектлени толтурургъа хазыр болгъанларын билдирирге керек эди. Ызы бла уа экспертлени сорууларына жууапла берирге да тюшгенди.
Сайлауну башлардан алгъа уа Парламентни Билим бериу, илму эм жаш тёлю политика жаны бла комитетини башчысы Светлана Азикова журналистле бла тюбешгенди.   Аны айтханына кёре,  бу орган он жылны ичинде хайырлы ишлеп, кесини магъаналылыгъын кёргюзтгенди. Тири, жамауат ишге къатышыргъа сюйген жаш адамлагъа ол «социал лифт» болуп, жашаугъа кенг жол ачханды дерге да боллукъду. «Башха жанындан а ол кадрла хазнады. Палатагъа районланы  келечилери да киргенлери уа  элледе жаш тёлюню  жарсыуларын ачыкъларгъа, аланы тамамлауну жолларын излерге онг береди. Бюгюнлюкде ол Парламентни ишине жангы кёзден къараргъа, ол санда законланы жарашдырыргъа да, себеплик этеди»,-дегенди ол.
Светлана Гаднановна палатаны бешинчи чакъырылыуу жетишимли болгъанын, аны къауумунда ишлегенлени тириликлерин  да белгилегенди. Анга уа РФ-ни Къырал Думасыны башламчылыгъы бла къуралгъан жаш тёлю форумда эмда «Мени законла жарашдырыуда башламчылыгъым» деген битеуроссей конкурсда хорлагъанланы бла  айырмалыланы санына киргенлери да шагъатлыкъ этеди.   
Ызы бла   айырыу башланнганды. Кертисин айтханда, ары келген жашла бла къызла жашауну тюрлендирирге, нёгерлерине  болушургъа,  жангы башламчылыкъла этерге хазыр болгъанлары кёрюнюп тура эди. Аладан бирлери тенглерини право жаны бла билимсизликлерин, кёпле айырыулагъа, властьха, кеслерини къарыуларына ийнанмагъанларын  белгилеп, аны тюрлендирирге кереклисин айта эдиле. Башхалары уа республикада жашагъан халкъланы   араларында мамырлыкъны, шуёхлукъну кючлеуге бурулгъан проектлени тамамларгъа сюйгенлерин,  спортну, культураны айнытыргъа кереклисин айтхандыла.
Жаш тёлю палатаны жангы къауумун Парламентни Билим бериу, илму эм жаш тёлю политика жаны бла комитетини депутатлары, экспертлени оюмларын эсге алып,  къабыл кёрлюкдюле.