КъБР-м и Iэтащхьэ КIуэкIуэ Казбек КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим щыIущIам тепсэлъыхьащ 2020 гъэм IэнатIэм щызэфIагъэкIахэм, дызэрыхьа илъэсыщIэм къапэщыт къалэнхэр гъэзэщIэнымкIэ щыIэ хэкIыпIэхэм.
Илъэс кIуам министерствэр яужь итащ лъэпкъ проектхэмрэ къэрал программэхэмрэ щыубзыхуахэр гъэзэщIэным. Лажьэу яутIыпща ухуэныгъэхэм ящыщщ Къэщкъэтау къуажэм щащIа иджырей физкультурэ-спорт комплексыр, яслъэхэр щылэжьэну унэ 29-р, Нартан жылэм ЩэнхабзэмкIэ и унэщIэр.
Бэрбэч Алим республикэм и УнафэщIыр щыгъуазэ ищIащ зэман гъунэгъум ятын хуэдэу ухуэныгъэ зыбжанэ хьэзыр зэрэхъуар. Абыхэм ящыщщ Шэджэм къалэмрэ Солдатскэ станицэмрэ щаухуа курыт школыщIэхэр, Щхьэлыкъуэ, Къэрэгъэш къуажэхэм дащIыхьа спорт комплексхэр. 2021 гъэм къриубыдэу ятынущ Ново-Ивановскэ къуажэм щащI школыщIэр, Куба къуажэмрэ Прохладнэ къалэмрэ еджапIэщIэхэр ухуэн щыщIадзэнущ. Бахъсэн Ипщэ, Бэтэх жылэхэм 2021 гъэм щаухуэнущ сабий нэхъ цIыкIу дыдэхэм щакIэлъыплъыну IуэхущIапIэхэр, Солдатскэ станицэм сабий садым и унэ къыщрагъэжьэнущ.
Республикэм и Iэтащхьэм гулъытэ хэха хуищIащ Налшык къалэм иджырей пятиборьем зыщыхуагъэсэну комплекс хэхарэ Мыл уардэунэрэ щыухуэным и Iуэхум. УнэтIыныгъэ нэхъыщхьэхэм ящыщу къагъэлъэгъуащ «Псы къабзэ» къэрал проектыр - абы хыхьэу Къэбэрдей-Балъкъэр Республикэм щыпсэухэр псыкIэ ирикъуу къызэгъэпэщыным хуэгъэпса ухуэныгъэ 19 ирагъэкIуэкIынущ.
ЗэIущIэм и кIэухым КIуэкIуэ Казбек министрым пщэрылъ щищIащ ухуэныгъэхэр зэрекIуэкIым набдзэгубдзаплъэу кIэлъыплъыну, къэрал зэгурыIуэныгъэхэм къыщыгъэлъэгъуа пIалъэм ахэр ятыным я нэIэ зэрытетыпхъэри къыхигъэщащ.
