Тюнене Нальчикде Къоз терек бахчаны тийресинде Ата журтну къоруулай жан берген комсомолчуланы хурметине ишленнген эсгертмени къатында ВЛКСМ-ни 100-жыллыгъына аталгъан митинг болгъанды. Анга коммунистле, комсомолну ветеранлары, толтуруучу власть органланы, жамауат биригиулени келечилери, студентле, школчула да къатышхандыла. Майданда культура эм солуу паркны духовой оркестри алгъадан окъуна комсомол жырланы макъамларын согъа,аланы узакъгъа эшитдиргенди.
Митинг Уллу Ата журт урушда жанларын-къанларын аямай сермешген комсомолчуланы бир минутну шош сюелип эсгериуден башланнганды. Аны комсомолну ветеранлары республикалы организациясыны таматасы Александр Жигатов ачханды.
Андан сора ВЛКСМ-ни ветеранларыны Нальчик шахар комитетини сыйлы председатели Юрий Шурдумов, аны орунбасары Байчеккуланы Нина, Черек районда алгъыннгы комсомолчуланы биригиуюню таматасы Къазийланы Анатолий, Прохладна, Бахсан районладан Алла Левченко бла Мухамед Зеушев сёлешгендиле эмда комсомол къыралны къоруулаугъа, урушдан сора аягъы юсюне салыугъа, аны айнытыугъа болмагъанча уллу къыйын салгъанын чертип айтхандыла.
Комсомол - ол Совет Союзну Жигити, БАМ, Тырныауузда вольфрам-молибден комбинат, Нальчикде «Искож» предприятие бла, дагъыда кёп башха магъаналы къурулушла бла къаты байламлыды дегендиле. Бюгюнлюкде жаш тёлюню бу биригиую кенгере баргъанын уллу ёхтемлик бла айтхандыла.
Митингге къатышханла  Ата журтну къоруулай жан берген комсомолчуланы эсгертмелерине, дагъыда ол тийреледе сюелген «Нальчик - аскер махтаулукъну шахары» стелагъа, афган урушда жоюлгъан аскерчилени эсгертмелерине да гюлле салгъандыла.