16 октябрьде Россейни Президенти Владимир Путин «Къабарты-Малкъар  Республика къуралгъанлы 100- жыллыгъын байрамлауну юсюнден» Указгъа къол салгъанды.
Документде Россей Федерацияны субъектлерини къырал власть органларына, жер-жерли самоуправленияны органларына 2022 жылда республиканы 100-жыллыгъыны байрамына хазырланыугъа эмда аны бардырыугъа  тири къатышыргъа керек болгъанлары эсгертиледи.
КъМР-ни Башчысыны къуллугъун болжаллы халда толтургъан  Казбек Коков Къабарты-Малкъарны жамауатыны атындан Владимир Путиннге  жюрек ыразылыгъын билдиргенди.
-Президентни бу Указы,-дегенди ол,- къырал башчы республикабызны халкъына, Къабарты-Малкъарны шёндюгю жашауун къурар ючюн кюн сайын арымай-талмай кюрешген , туугъан республикаларыны жетишимлерин бла хорламларын керелеген адамларына энчи кёзден къарагъанына шагъатлыкъ этеди.
   Бу документни бизге магъаналылыгъын айтып ангылатхан окъуна къыйынды. Ол  жамауатыбызны бирикдирирге, битеу кючюбюзню да республикабызны эмда саулай Ата журтубузну айнытыугъа  бурургъа бютюн бек кёллендирлигине ишексизме.