Къабарты-Малкъарны Башчысыны къуллугъун болжаллы халда толтургъан Казбек Коков Урван, Май,Чегем, Элбрус, Бахсан районлада эл мюлк предприятиялада болгъанды, Бахсан шахарны агропромышленный бизнес-инкубаторуну тийресинде бардырылгъан бизнес-форумгъа къатышханла бла да тюбешгенди.
Республиканы предпринимательлерине айланып, КъМР-ни оноучусу кеслерини энчи ишлерин ачаргъа сюйгенлеге ахшы болумла къурау, бизнесни къайсы тюрлюсюне да билеклик этиу жууукъ заманлада тамамланыллыкъ борчладан бирлери болгъанларын эсгертгенди. Алай бек башы - жамауат-политика ырахатлыкъны сакълауду, тынчлыкъ болмаса, киши бир сомун къората турлукъ тюйюлдю, дегенди.
-Бу ишге специалистлени да къатышдырырча, аланы бек алгъа бизни жашларыбыздан бла къызларыбыздан хазырларча мадарла да этерикбиз,-деп, Коков КъМР-ни Правительствосуна тийишли амалла жарашдырып берирге буюргъанды.
 Тюбешиуню кезиуюнде инвестицияла не къадар кёп салынырча этиуге, финансла бла ишни игилендириуге, гитче предприятиялагъа банк системаны юсю бла ахча себеплик этиуге, административ тыйгъычладан къутулуугъа, коммуникацияла бла финанс операцияла жаны бла ахшы сынауланы хайырланыугъа энчи эс бурулгъанды.