«Билим бериу» миллет проектни чеклеринде саулай къыралны эллеринде «Точка роста» деген арала къуралгъандыла. Ала, мектеплени башха кабинетлеринден дизайнлары бла айырмалы болгъанларындан сора да, гуманитар эм цифралы профильлеге сейирлери болгъан жаш адамлагъа кеслерин ачыкълар онгла берликдиле. Шёндюгю технологияла, программирование бла кюреширге сюйген окъуучуланы ол аралада муратларына жетер амаллары барды.
Озгъан ыйыкъда Яникой элни орта школунда да «Точка роста» араны къууанчлы ачылыуу болгъанды. Ол кюн школчулагъа къонакъгъа КъМР-ни Билим бериу эм жаш тёлю политика жаны бла министри Анзор Езаов, Чегем районну администрациясыны башчысы Юра Борсов, районну билим бериу управлениясыны таматасы Жанна Арипшева келгендиле.
Школну арбазында къонакъбайла, байрам программаларын кёргюзтюп, билимни жолун сайлагъанларын айтхандыла. Министр Анзор Езаов, алагъа ыспас этип, арада дерследен сора окъуучула жууукъ заманда абаданланы кеслерини жетишимлери бла къууандырырларына ийнаннганын билдиргенди. Ызы бла къызыл тасманы кесип, кабинет бла шагъырейлениу болгъанды.
Мындагъы арада юйретиу бир ненча ызда бардырыллыкъды: «Технология», «ОБЖ», «Шахматла бла шашкала», «Цифралы технологияла». Кеси да шёндюгюлю компьютерле, видеокамерала, принтерле, тренажёр манекенле эм квадракоптер бла жалчытылыныпды.
Окъутуу ишни мында юч устаз Афашокъаланы Исмайыл, Таппасханланы Расул эм Деуаланы Расул бардырлыкъдыла. Сёз ючюн, Исмайыл Сюлеменовични аты саулайда республикагъа белгилиди. Аны сохталары бюгюнлюкде шашкаладан республикада экинчи жердедиле.
Таппасханланы Расул бла Деуаланы Расул а «ОБЖ» эм «Технология» предметледен устазладыла. Бюгюнлюкде терк медицина болушлукъ тапдыра билиуге къайда да аслам эс бёлюнеди. ОБЖ-ны дерслеринде да анга энчи юйретедиле.
Сабийлени цифралы технологиялагъа сейирлери уллу болгъаныны юсюнден да айтхандыла къонакълагъа. Бир-бирле компьютерде кеслери квадракоптерлени юлгюлерин этип да кёргюзтгендиле. Окъуучула быллай араны ачылгъанына къууаннганларыны юсюнден школну директору Къудайланы Айшат да билдиргенди.