Шабат кюн 13 октябрьде, Ишчи борчларын толтургъан кезиуде ёлтюрюлген полициячыланы эсгериуню кюнюне аталып, Нальчикде Милицияны  скверинде бушуулу митинг болгъанды. Мамыр республиканы аманлыкъчыладан къоруулай жоюлгъан жигитлеге хурмет этерге  келгенлени арасында КъМР-ни Башчысыны къуллугъун болжаллы халда толтургъан Казбек Коков, Парламентни бла Правительствону оноучулары, КъМР-ни Башчысыны Администрациясыны, кюч структураланы, жамауат эм дин организацияланы келечилери, ич ишле органлада къуллукъ этгенле, ветеранла, жоюлгъан полициячыланы жууукълары-ахлулары да бар эдиле.
Алагъа къайгъы сёз бере, КъМР-де ич ишле министр, полицияны генерал-лейтенанты Игорь Ромашкин  онюч жыл мындан алгъа болгъан бушуулу ишге КъМР-ни тарыхына жазылгъанларын чертгенди. «Биз батыр нёгерлерибизни атларын эсибизде тутабыз, аланы ёмюрлюк этерге борчлубуз»,-дегенди ол.
 Жыйылгъанла аманлыкъчыланы къолларындан ёлген полициячыланы бир минут шумсуз туруп эсгергендиле.
Митингде «Юйюгюзге мамырлыкъ» жамауат организацияны башчысы, КъМР-де МВД-ны Жамауат советини келечиси Суфадин Шибзухов, толтуруучу власть органланы терроризмге къажау ишлерин бирге тийишдириу жаны бла министр Залим Кашироков,  КъМР-ни Жамауат палатасыны жаш тёлю советини башчысыны орунбасары Чеченланы Рустам да сёлешгендиле.
Муслийманланы дин управлениясыны башчысы Хазратали Дзасежев бла Пятигорск эм Черкесск эпархияны Нальчик округда благочинный Валентин Бобылев а дин тёрелени бардыргъандыла.
Жаш тёлю кёп функциялы араны волонтёрлары полициячыланы хурметине кёкге акъ шарланы ийгендиле. Ахырында бушуулу митингге къатышханла эсгертмеге гюлле салгъандыла.