«Единая Россия» политика партияны КъМР-де жамауат приёмныйинде инсанла бла эки темагъа тюбешиуле бардырылгъандыла. Биринчиден, соруулары болгъанлагъа хакъсыз юридический болушлукъ берилгенди. Экинчиден, школгъа дери билим бериу системада кемчиликлени, жарсыуланы ачыкъларгъа онг болгъанды.
Хакъсыз юридический болушлукъну КъМР-ни Жамауат палатасыны комиссиясыны башчысы – «Россейни юристлерини ассоциациясы» жамауат организацияны регион бёлюмюню башчысы Ануся Целоусова бергенди. Анга болушлукъ излеп келгенледен бирлери газ ючюн тёлеуледе кемчиликлеге тарыкъгъандыла. Тиширыу билдиргенича, ол борчну жыймай, ахчаны заманында береди. Алай быйыл а газны эсепге алгъан счётчикни тинтирге керекди деген сылтау бла андан ахча излегендиле. «Мен билгенден, быйылдан башлап, счётчиклени тинтиу, аланы алышыу жумушла къыралны боюнуна салыннгандыла. Алай бизден а ахча излейдиле, кесин да къолдан къолгъа берсек сюедиле»,-дегенди ол.
Ануся Целоусованы айтханына кёре, бирде быллай керексиз тёлеулени лицензиялары болмагъан компанияла толтуртадыла. «Ала тамата тёлю шёндюгю онгланы билмегенлерин, интернет бла хайырланалмагъанларын ангылап, аладан къошакъ ахча алыргъа ёчдюле. Сиз а эркинликлеригизни къоруулар ючюн битеу документлени, квитанцияланы да алып, прокуратурагъа тарыгъыргъа эркинсиз»,-деп юйретгенди ол.
Школгъа дери билим бериу системада жарсыуларын а келгенле КъМР-ни Парламентини Билим бериу, илму эм жаш тёлюню ишлери жаны бла комитетини башчысы Нина Емузовагъа бла КъМР-ни Жарыкъландырыу, илму эм жаш тёлюню ишлери жаны бла министерствосуну Школгъа дери, битеулю орта, профессионал эм къошакъ билим бериу жаны бла управлениясыны башчысы Марина Мизовагъа айтхандыла.
Сёз элледен сабийлени Нальчикде школладан бирине берирге эркин этилгенини бла къалгъаныны юсюнден баргъанды. Тиширыу айтханыча, ол эри бла шахарда ишлейдиле, балаларын элде школгъа жюрютюрге, андан алыргъа заманлары жетишмейди.
Нина Гузеровнаны ангылатханына кёре, башха жерден баланы школгъа жаздырыргъа эркинлик барды. Алай, законда тохташдырылгъаныча, классланы къурагъанда бек алгъа школну тийресинде жашагъанлагъа башчылыкъ бериледи. Аладан сора эркин жерле къалсала, башха жерледен жашчыкъла бла къызчыкъла алынадыла. Андан сора да, кёп болмай ишлеп башлагъан низамгъа тийишлиликде, сабийледен тамата жюрюген учреждениягъа кичилери да бир тюрлю чырмаусуз жазыладыла.
Сабий садлада кичи юйретиучюню айлыгъын кёбейтиуню мадарларын да сюзгендиле. Приёмгъа келгенледен бири аны хакъы шёндю 11 мингнге жетгенин, алай ол аз болгъанын. кеси да юч бала ёсдюргенин айтханды. Нина Емузова бюджет сферада ишлегенлени къолайлыкъларын игилендириу магъаналы сорууладан бири болгъанын чертгенди. Бюгюнлюкде уа къырал власть органла, профсоюзла да аны ёсдюрюу жаны бла мадарла толтурадыла.
Ахча тёлеп, сабий садлада къошакъ билим билим бериу программала кийирирге жараймыды, деп да соргъандыла. Нина Емузова ангылатханыча, школгъа дери билим бериу программада белгиленнген битеу дерсле хакъсыздыла. Алай атала, анала келишип, сабийлери энтта башха билим алырларын сюйселе, тышындан адамланы чакъырыргъа боллукъду. Алай аланы дерслери ючюн да ахчаны ата-анала, бирге келишип, кеслери тёлейдиле.
Битеу да бирге ол кюн приёмгъа 11 адам келгендиле. Аланы сорууларына жууапла берилгендиле, законла ангылатылгъандыла. Депутат тинтиуле керек болгъан жарсыула уа эсепге алыннгандыла.
Ахырында Нина Емузова бу кюнледе къыралда юйретиучюле кеслерини профессионал байрамларын белгилериклерин эсгертип, аланы алгъышлагъанды эмда ишлеринде жетишимле тежегенди.
