Къабарты-Малкъарда коронавирус ауруу жайылыу жаны бла болумну юсюнден тюнене республиканы Правительствосуну юйюнде пресс-конференция бардырылгъанды. Бу кюнледе болумну юсюнден эм келир кезиуледе ол къайсы жанына тюрленирге боллугъуну юсюнден КъМР-ни саулукъ сакълау министри Рустам Калибатов бла Роспотребнадзорну регионда Управлениясыны таматасы Жираслан Пагов хапарлагъандыла.
Биринчиден талай статистика шарт. Тюненеге республикада COVID-19 вирусха жукъгъанланы санына 41 адам къошулуп, битеу да 7441 болгъанды. Аладан 6425 адам къайтышханды. Жай айлада болум игиге тюрленнгенди, алай августну ахырындан башлап саусузланы саны жангыдан кёбейип башлагъанды. Аны хатасындан алгъаракъда элледен биринде орта школну карантиннге жабаргъа эмда талай госпитальны къайтарып ачаргъа тюшгенди.
Жираслан Пагов ол сёзлеге шагъатлыкъ этип, тёрели ОРВИ бла бирге коронавирус да тирилип башлагъанын белгилегенди: «Тюзюн айтханда, биз алай болурун сакълагъанбыз. Кесигиз ангылайсыз, жайдан сора кюз салкъынла, ызы бла сууукъла да келедиле – тамакъ эмда ёпке ауруула къозгъалыучу кезиуле. Алай, жарсыугъа, вирус жайны ахыр кюнлеринден окъуна жангыдан тиргизилгенди».
Иш алай нек болгъанын Управленияны башчысы окъуу жыл башланнганында эмда аслам халкъ тышында солуудан къайтханында кёргенди: «Билим бериу учреждениялагъа эки жюз минг чакълы сабий эм педагог жюрюйдю. Аллай коллективледе, отоулада адам саны кёп болгъан жерледе жукъгъан ауруулагъа жайылгъан бек женгилди.
Дагъыда вирусну солугъан жерлеринден алып келгенле да бардыла. Сёз ючюн, Краснодар крайдан – оноулан, Кърымдан – тёртеулен, Дагъыстандан – бешеулен, тыш къыралладан да бир ненчасы. Санаторийледе кечиннгенлени арасында да ауругъанла ачыкълана туруучудула».
Адам улуну кесин сакъларгъа не аз болса да къолундан келликди. Жираслан Пагов айтханнга кёре, жети-он кюнню ичинде хал тюрленмесе, аны ведомствосу, Саулукъ сакълау министерство бла бирге чеклениулени бир кесегин жангыдан кийирирге кереклисин Оператив штабха билдирликдиле. Сёз мында эм биринчиден тойланы, аслам халкъ басыннган къууанчлы эмда культура жумушланы, сора парклада жюрюуню да тыйыуну юсюнден барады.
Дууаланы да, ДУМ бла оноулашып, аз адам жюрюрча этерге керекди дегенди ол: «Бу оноуланы адамла ангыларла деп ышанабыз. Шёндю уллу кёллюлюкге жер жокъду, хар не да тапды деп тургъан игиге келтирмезлик алдау сезимди».
Айтылгъанны, жорукъланы сансыз этерге керекмейди. Аллайланы санында тёрт тюкен эмда бир ариулукъну салону барды. Сюдню оноуу бла аланы ишлери тыйылгъанды. Дагъыда тышындан келген гражданла тест бериуню, талай заманны юйде олтуруп турургъа керек болгъанын да унутмазгъа керекдиле. Низамлыкъны бузгъанла административ жууапха тартыллыкъдыла, деп эсгертгенди Управленияны башчысы.
