КъМР-ни Башчысыны къуллугъун болжаллы халда толтургъан К.В.Коков Къабарты-Малкъарны Правительствосуну башчылары бла биринчи ишчи тюбешиу бардыргъанды. Аны кезиуюнде къыралны Президенти В.В.Путинни «Россей Федерацияны 2024 жылгъа дери айнытыуну миллет жумушларыны бла стратегия борчларыны юсюнден» май указын толтуруу не халда болгъанына къаралгъанды.
- Бизге 12 миллет проектни бла регион жол карталаны толтуруугъа къатышыуубуз къаллай бирге хайырлы болгъанын тинтип, андан хыйсап этерге керек боллукъду,-деп чертгенди Коков.
КъМР-ни Правительствосуну Председатели Мусукланы А.Т. хар миллет проектге кёре тамамланыллыкъ жумушлагъа къаллай бир ахча керек болгъаны тергелип хазыр болгъанын билдиргенди. «Аны хайырындан федерал арагъа «Демография», «Саулукъ сакълау», «Билим бериу», «Жашау журтла бла шахарда болум», «Экология», «Къоркъуусуз эмда жараулу автомобиль жолла», «Ишни файдалылыгъы эмда иш бла жалчытыугъа себеплик этиу», «Цифрли экономика», «Культура», «Гитче эмда орталыкъ предпринимательлик», «Халкъла аралы кооперация эмда экспорт» жаны бла проектлени толтуруу бла байламлы предложенияланы заманында берирге къолубуздан келгенди», - дегенди ол.
Миллет проектлени бла программаланы толтурууну тап къурар, аладан дайым да хапарлы болуп турур, къырал властьны жер-жерли органларыны бла жер-жерли самоуправленияны ишлерин бирге тийишдирир муратда республиканы Правительствосу КъМР-ни Башчысында Стратегиялы айныу эмда миллет проектле жаны бла совет къурауну юсюнден указны проектин хазырлагъанды.
Кенгешде КъМР-ни Правительствосуну Председателини биринчи орунбасары М.А.Керефов, КъМР-ни Правительствосуну Председателини орунбасарлары М.Н.Карданов бла Г.О.Мовсисян, КъМР-ни Правительствосуну Председателини орунбасары – инфраструктура эмда цифрли айныуну министри В.Х.Болотоков, КъМР-ни табийгъат байлыкъла эмда экология министри Шауаланы И.П. сёлешгендиле.