«Шынагъуэншэ фIагъ лъагэ зиIэ гъуэгухэр» лъэпкъ проектым и къалэн нэхъыщхьэр щIыналъэхэм щы­щыIэ автомобиль гъуэгухэр мардэм къигъэтIэсэ-нырщ. Абы ипкъ иткIэ Къэбэрдей-Балъкъэрым лэ­-жьы­гъэшхуэ щызэфIах.

Бахъсэн муниципальнэ щIыналъэм щызэрагъэ­пэщыж «Кавказ» автомагистралым къыхэкIыу километр 13-кIэ Куба къуажэм ухуэзышэ гъуэгур. Ар кIуэцIрокI ­социальнэ мыхьэнэ зиIэ объектхэр - егъэджэныгъэр щрагъэкIуэкI, узыншагъэр щахъумэ IуэхущIапIэхэр, къуажэ администрацэр, спорт-узыншагъэр щрагъэфIакIуэ комплексыр - зытет Лениным и цIэр зезыхьэ цIыху 5182-рэ щыпсэу къуажэм и уэрам нэхъыщхьэм. ИджыпстукIэ ­гъуэгур ягъэкъабзэ, телъа асфальтыр къытрахыурэ, лъэмыжыр ягъэбыдэ.
Мыгувэу автомобиль гъуэгум асфальтыщIэ тралъхьэнущ, лъэс зекIуапIэхэр зыхуей хуагъэзэнущ, светофорхэр ягъэувынущ. Лэжьыгъэ псори шыщхьэуIу (август) мазэм къриубыдэу зэфIагъэкIыну я мурадщ.