Дыгъуасэ Къэбэрдей-Балъкъэрым лэ­жьыгъэ IуэхукIэ щыIащ Урысей Федерацэм промышленностымрэ сатумкIэ и министр Мантуров Денис. Федеральнэ къулыкъущIапIэм и унафэщIыр кIуащ медицинэ рентген Iэмэпсымэ зэмылIэужьыгъуэхэр къы­щIэзыгъэкI «Севкаврентген-Д» IуэхущIапIэм. 2008 гъэм къыщыщIэдзауэ а заводым зэхъуэкIыныгъэхэр щрагъэкIуэкI, зэрылажьэ оборудованэр зэманым къигъэувхэм пэлъэщын хуэдэу яхъуэж, бжыгъэр зи лъабжьэ иджырей технологиещIэхэр къагъэсэбэп. ЧПУ оборудованэхэр ягъэуващ, я лэжьыгъэ, мылъку зэхущытыкIэхэр зэгъэкIуауэ щытыным хуэгъэпса, я дэфтэрхэр хъумэным къы­хуагъэсэбэп инфраструктурэхэр къызэрагъэпэщащ.
Мантуров Денис зыщиплъыхьащ бжыгъэр и лъабжьэу ягъэлажьэ станокхэр зыщIэт цехым, рентген Iэмэпсымэхэр щызэпкъралъхьэ цехым. Министрыр ­икъукIэ арэзы техъуащ илъэгъуахэм, заводым и лъэщагъым.
«Мыр иджырей IуэхущIапIэ лъэщщ, абы лэжьэн зэрыщIидзэрэ илъэс 60 дэкIами. Мыхьэнэшхуэ зиIэращи, «Севкаврентген-Д»-м езым и конструктор ­бюро иIэжщ икIи абы щызэпкъралъхьэнухэр абы къыщагупсыс - ар программэкIэ къызэгъэпэщыным ехьэлIами е оборудованэхэм я схемэхэр зэхуэгъэ­кIуэнрами. IуэхущIапIэр сатукIэ япыщIа хъуащ гъунэгъу къэралхэм, иджы ди ­мурадщ и продукцэр хамэ хэку жыжьэхэми яхуригъашэу Iуэхур зэтеухуэнымкIэ зыщIэдгъэкъуэну. Ар дгъэзэщIэнущ «Дунейпсо кооперацэмрэ продукцэр къэралым ирегъэшынымрэ» лъэпкъ проектым хыхьэу, апхуэдэуи Сату зэдэщIыным хуэгъэпсауэ щыIэ IуэхущIапIэхэри къэдгъэ­сэбэпынущ», - илъэгъуахэм я гугъу щищIым жиIащ Мантуров Денис.
КъБР-м и Iэтащхьэ КIуэкIуэ Казбекрэ УФ-м промышленностымрэ сатумкIэ и министр Мантуров Денисрэ абдеж щы­зэпсэлъащ. Зи гугъу ящIа Iуэхугъуэхэм ящыщщ Къэбэрдей-Балъкъэр Респуб­ликэм хыхьэ Тырныауз щIыпIэм деж ­вольфрамрэ молибденрэ къыщыщIэ­хы­нымрэ абыхэм елэжьынымрэ хуэунэтIа лэжьыгъэхэр зэтеухуэжыныр.
«2023 гъэм и кIэм ирихьэлIэу Тырныауз къыщIэхыпIэм къыщыщIагъэкIа продукт къытIэрыхьэн хуэдэу Iуэхур зэфIыхьэну дыщогугъ», - зэIущIэм и кIэм жиIащ ­Урысейм промышленностымрэ сатумкIэ и министрым.
КъБР-м и Iэтащхьэм министрым фIы­щIэ хуищIащ щIыналъэм къыхуащI гулъытэмрэ кърат дэIэпыкъуныгъэмрэ ­папщIэ. «ФIыщIэ пхузощI ди IуэхущIапIэхэм я лэжьэкIэм щыгъуазэ зэрызып­-щIам, абы щекIуэкIхэр зэрызэбгъэлъэ­гъуам, дэтхэнэ унафэщIми гупсэхуу узэ­репсэлъам, чэнджэщ щхьэпэхэр зэ­рептам папщIэ. Нобэрей зэIущIэр сэбэп хуэхъунущ Къэбэрдей-Балъкъэрым и промышленность IэнатIэм зиужьыным. Дэри къыдэлъыта къэдгъэнэнкъым ди сэбэп хэлъу дызэдэлэжьэн щхьэкIэ», - къыхигъэщащ КIуэкIуэ Казбек.
А махуэ дыдэм Мантуров Денис щы­гъуазэ зищIащ щIыналъэм и нэгъуэщI IуэхущIапIэхэм къыщIагъэкI промыш­леннэ продукцэхэр зыхуэдэми. Урысеймпромышленностымрэ сатумкIэ и министрым къигъэлъэгъуащ республикэм ­нэхъыбэу ирашыр ерыскъыпхъэ продукцэхэрауэ зэрыщытыр, апхуэдэу гъущIымрэ абы къыхэщIыкIахэмрэ зэры­арар. Абы щхьэхуэу къыхигъэщащ республикэм нэгъуэщI щIыпIэхэм ярищэм и процентищэр, къанэ щIагъуэ щымыIэу, продукцэ хьэзыру зэрыщытыр. Министрым гу лъаригъэтащ къэбгъэсэ­бэ­пы­ным хуэхьэзыр апхуэдэ продукцэ нэхъыбэ къыщIэгъэкIыныр «Дунейпсо ­кооперацэмрэ продукцэр къэралым ­ирегъэшынымрэ» лъэпкъ проектым къы­щыгъэлъэгъуа къалэн нэхъыщхьэхэм зэращыщым.
«Республикэм и пIалъэ ещIэ, ар къызыхащIыкIхэр мыхъуу, продукцэ хьэзыр щэхуакIуэхэм яхуегъэшэным, иджы мыхьэнэшхуэ иIэщ абыхэм къахэгъэхъуэ­ным, щIыналъэм иIыгъ увыпIэхэр имыу­тIып­щыным. Дэ тхузэфIэкIкIэ зыкъы­щIэдгъэкъуэнущ абы, Сату зэдэщIэным хуэгъэпса дунейпсо IуэхущIапIэхэмрэ Урысей экспорт центрымри Iуэхум къы­хэт­шэнущ», - къыхигъэщащ Мантуров Де­нис.
Абы апхуэдэуи жиIащ коронавирусым и зэранкIэ пандемием и хабзэхэр зэра­гъэувам ипкъ иткIэ Урысейм Промыш­ленностымрэ сатумкIэ и министерствэм урысей продукцэр хамэ къэралхэм щы­щэным сэбэп хуэхъуну Iуэхухэр зэриубзыхуар, ахэр шэщIауэ зэрылажьэр. А платформэхэр къыхалъхьэу лэжьэн зэ­рыщIидзэрэ а Iэмалыр къагъэсэбэпащ зи продукцэр хамэ къэралхэм езыгъэ­шэну хуей IуэхущIапIэ минитIым нэблагъэм. Мантуров Денис Къэбэрдей-Балъкъэрым и промышленнэ, сату IуэхущIапIэхэу зи продукцэхэр хамэ хэкухэм щы­зыщэну зи мурадхэри къыхуриджащ а лэжьыгъэм хыхьэну.