КъБР-м и Парламентым и УнафэщI Егоровэ Татьянэ фокIадэм и 27-м иригъэкIуэкIащ бжьыхьэ лэжьэгъуэм и япэ зэIущIэр. Зэрыхабзэу, ар къызэIуахащ Урысей Федерацэмрэ Къэбэрдей-Балъкъэр Республикэмрэ я гимнхэмкIэ.
УФ-м и Федеральнэ Зэхуэсым ФедерацэмкIэ и Советым хэт Ульбашев Мухьэрбий ЩIыхь тхылъхэр зыхуагъэфэща депутат зыбжанэм яритыжащ. УФ-м и Федеральнэ Зэхуэсым ФедерацэмкIэ и Советым и ЩIыхь тхылъыр хуагъэфэщащ илъэс куэд хъуауэ республикэм и хабзэубзыху IуэхущIапIэм зегъэужьыным зи гуащIэ хэзылъхьэ, КъБР-м и Парламентым ЭкономикэмкIэ, инвестицэхэмрэ хьэрычэт IуэхухэмкIэ и комитетым и унафэщI Iэпщэ Заур, ФедерацэмкIэ Советым и УнафэщIым и ФIыщIэ тхылъыр абы иритащ КъБР-м и Пар-ламентым и ПромышленностымкIэ, транспортымкIэ, связымрэ гъуэгу IэнатIэмкIэ и комитетым и унафэщI Гугу Владимир.
КъБР-м и Парламентым и депутат Саенкэ Татьянэ и къалэнхэр щхьэщахащ, Май районым и щIыпIэ администрацэм и Iэтащхьэм и къулыкъур къызэрыхуагъэлъэгъуам къыхэкIыу.
Депутатхэм даIыгъащ КъБР-м и Парламентым УхуэныгъэмкIэ, псэу-пIэ-коммунальнэ IэнатIэмрэ гъэсы-ныпхъэ-энергетикэ IуэхущIапIэхэмкIэ, ЭкономикэмкIэ, инвестицэхэмрэ хьэрычэт IуэхухэмкIэ и комитетхэм Бэджыдэ Мухьэмэд хагъэхьэну къызэрагъэлъэгъуар.
ЗэхъуэкIыныгъэхэр халъхьащ Къэбэрдей-Балъкъэр Республикэм и къэрал къулыкъухэр зэрыт Реестрым. Абы ипкъ иткIэ, Къэбэрдей-Балъкъэрым и министрхэм я япэ къуэдзэ IэнатIэщIэр ягъэбелджылащ.
ЗэIущIэм щытепсэлъыхьащ «Къэбэрдей-Балъкъэр Республикэм и бюджетыр 2018 гъэм, 2019 - 2020 гъэхэм ятещIыхьауэ» Хабзэм и проектым.
- Къэбэрдей-Балъкъэрым федеральнэ бюджетым къыхэкIыу сом мелуан 583-рэ лейуэ къыхуаутIып-щащ. Абы щыщу сом мелуани 119,30-р трагъэкIуэдэнущ бюджет IэнатIэ Iутхэм я улахуэм хагъэхъуэным, пщIэншэу хущхъуэ зратын хуей цIыхухэм, - жиIащ КъБР-м финансхэмкIэ и министрым и къалэнхэр зыгъэзащIэ Лисун Еленэ. - Социальнэ дэIэпыкъуныгъэр, егъэджэныгъэ IэнатIэр ирагъэфIэкIуэнми а ахъшэм щыщ хухахынущ.
ЗэIущIэм етIуанэ еджэгъуэу къыщащтащ «Къэбэрдей-Балъкъэр Республикэм и гъуэгу фондым и бюджетым теухуауэ» КъБР-м и Хабзэм и 4-нэ Iыхьэм зэхъуэкIыныгъэхэр хэлъхьэ-ным и IуэхукIэ» Къэбэрдей-Балъкъэр Республикэм и Законым и проектыр. АбыкIэ я мурадщ гъуэгу шынагъуэншагъэм теухуауэ УФ-м щызекIуэ хабзэхэр къызэрызэпаудамкIэ ирагъэпшын къуэдыр гъуэгу фондхэм ягъэкIуэну. КъищынэмыщIауэ, гъуэгухэр зыхуей хуагъэзэн папщIэ, проектым щагъэбелджылащ фондым нэгъуэщI Iуэхухэм къыпэкIуэу хэхъуэ иIэнымкIэ Iэмалхэр. Абыхэм ящыщщ машинэ хьэлъэзешэхэм гъуэгур зэракъутэм, хьэпшыпхэр хабзэм къемызэгъыу къызэрырашэкIым, нэгъуэщIхэми къыхэкIыу ирагъэпшыныну къуэдыхэр.
Депутатхэр арэзы техъуащ «Пенсэ кIуэгъуэм нэблэгъахэм ират къэрал дэIэпыкъуныгъэм теухуауэ» Къэбэрдей-Балъкъэр Республикэм и Хабзэм и проектым, «Къэбэрдей-Балъкъэр Республикэм и бюджетыр 2018 гъэм и япэ илъэс ныкъуэм зэрагъэзэщIам теухуауэ» КъБР-м и Правительствэм ищIа отчетым.
ЗэIущIэм щыхэплъащ Къэбэрдей-Балъкъэрымрэ Осетие Ищхъэрэ - Аланиемрэ я гъунапкъэ зэпылъыпIэм хуэзэу щыIэ бгым Прохоренкэ Александр и цIэр фIэщынымкIэ къыхалъхьа Iуэхум. КъБР-м и Парламентым ЗаконодательствэмкIэ, къэрал ухуэкIэмрэ щIыпIэ унафэр зегъэкIуэнымкIэ и комитетым и унафэщI Мэлбахъуэ Борис жиIащ абы теухуауэ Осетие Ищхъэрэ - Алание Республикэм и Парламентым зэрызыкъыхуагъэзар, УФ-м ЗыхъумэжыныгъэмкIэ и министерствэми ар зэрыдиIыгъыр. «ЗэрыфщIэщи, Прохоренкэ Александр Си-рием и къалэн щигъэзащIэу щыхэкIуэдащ. Абы и цIэр зыфIащыну къагъэлъагъуэ бгыр щIыпIэкIэ Сухонскэ къуршым хуозэ икIи абы укъыщеплъыхкIэ а бгыр Къэбэрдей-Балъкъэрым и щIыналъэм щыщу уолъагъу. Аращ ди гъунэгъу республикэм дэ зыкъытхуигъэзэн хуей щIэхъуар. ТфIэтэмэмщ а Iуэхур ядэтIыгъыну», - жиIащ Мэлбахъуэм.
Правительствэм хухах сыхьэтым хыхьэу, зэIущIэм щедэIуащ 2018 гъэм Зыуэ щыт къэрал экзаменыр Къэбэрдей-Балъкъэрым зэрыщекIуэкIам кърикIуам. Абы теухуауэ къэпсэлъащ КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министрым и къалэнхэр зыгъэзащIэ Къумыкъу Iэуес. Абы къызэрыхигъэщамкIэ, егъэджэныгъэ программэхэмкIэ къэрал аттестацэм (ГИА) мы гъэм хэтащ цIыху 4745-рэ. Абыхэм ящыщу Зыуэ щыт къэрал экзаменыр ятащ 4679-м. ЕджакIуэхэм езыхэм я фIэфIыныгъэкIэ ятыну нэхъыбэу къыхаха дерсхэм ящыщщ обществознаниер, математикэр, тхыдэр, биологиер, химиер, физикэр. Нэхъ мащIэм ятащ географиер, информатикэр, литературэр, хамэ къэралыбзэхэр. Къэпсэлъам зэрыжиIамкIэ, экзаменхэр щекIуэкIым лъэпощхьэпо щыIакъым. 2018 гъэм балли 100 къахьащ еджапIэ къэзыуха цIыху 22-м.