Урысейм и Президент Путин ­Владимир вэсэмахуэ видеоконференц мардэм ит зэIущIэ ядригъэкIуэкIащ федеральнэ къулыкъущIапIэхэмрэ щIыналъэхэм я унафэщIхэмрэ. Ар теухуауэ щытащ мы зэманым щыIэ санитар-эпидемиологие щытыкIэмрэ къэ­ралым щыпсэухэм, экономикэм зэрызыщIагъакъуэ Iэмалы­щIэ­хэм­рэ. ЗэIущIэм хэтащ КъБР-м и Iэтащхьэ КIуэкIуэ Казбек.

Путин Владимир къыхигъэщащ цIыхухэр мылэжьэну ягъэувауэ щыта пIалъэм эпидемием зэры­зиубгъум и псынщIагъэр ягъэ­мэ­щIэнымкIэ Iэмал къызэритар икIи узыншагъэр хъумэн IэнатIэм а Iуэ­хум нэхъыфIу зыхуигъэхьэзырын              а зэманым къриубыдэу зэрыху­зэфIэкIар. Узыфэм нэхъ къигъэгузавэхэм, ар нэхъ хьэлъэу зэфыкI-хэм щакIэлъыплъын папщIэ зы­хуеину псомкIи къызэгъэпэщауэ щыIа гъуэлъыпIэ мин 29-р мини  130-м нагъэсыфащ, Iэмэпсымэ зы­хуэныкъуэнухэм хуэдэу зрикъунум хуэдиз сымаджэщхэм зэрагъэ­пэ­щыфащ, тхьэмбылыр зэрагъэбауэ Iэмэпсымэу хэпщIыкIыу нэхъыбэ ягъэхьэзыращ. Сымаджэхэм хущхъуэфIхэр къагъэсэбэпурэ еIэзэ ­хъуащ, узым нэхъ лъэщу пэщIэтыф хущхъуэу къыщIагъэкIри куэдкIэ нэхъыбэ ящIащ.
ЗэхъуэкIыныгъэфIхэм ящыщщ узыфэр къахутэн мурадкIэ ирагъэкIуэкI къэпщытэныгъэхэм я  бжы­гъэми куэдкIэ хагъэхъуэн зэ­рахузэфIэкIар. Махуэ къэс къэралым тестхэр щрагъэт цIыху мини 170-м нэблагъэм, ар дунейм щы­нэхъыбэ дыдэхэм ящыщщ. Абы Iэмал къет узыфэр хэмытIасэу къэ­ху­тэнымкIэ, ар Iэпкълъэпкъым емыгуауэ щIыкIэ абы пэщIэувэнымкIэ, инфекцэм земыгъэубгъунымкIэ.
А зэфIэдгъэкIа псоми, къыхи­гъэщащ Президентым, Iэмал къыдет эпидемием ебэныным и къы­кIэлъыкIуэ Iыхьэм дыхуэкIуэным-кIэ, цIыхухэр IэмалыншагъэкIэ ­зрагъэувэн хуей хъуа мардэ пыу­­хыкIахэм мащIэ-мащIэурэ дыкъытекIыу щIэддзэнымкIэ. Абы къы­хэкIыу зэрыкъэралуи, экономикэм  и IэнатIэ псоми я дежкIэ мылэжьэ­гъуэ махуэу дгъэувауэ щытахэр еух.
Накъыгъэм и 12-м къыщыщIэ­дзауэ, зыхуэфащэ санитар мардэхэм дытету, Iэмал щыIэ хъуащ экономикэм и лъабжьэу щыт IэнатIэхэм хыхьэ IуэхущIапIэхэм - ахэр ухуэныгъэрщ,  промышленнос­тырщ, мэкъумэш хозяйствэрщ, свя­зырщ, энергетикэрщ, хъугъуэ­фIы­гъуэхэр щIым къыщIэхынырщ - я лэжьыгъэм щIадзэжыну.
Нэхъапэми хуэдэу, я лэжьыгъэм пащэнущ властым и къэрал, му­ниципальнэ органхэм, къэувыIэ ­мыхъу IэнатIэхэм, медицинэ IуэхущIапIэхэм, аптекэхэм, финансым пыщIахэм, ерыскъыпхъэхэмрэ ­цIы­хухэр Iэмал имыIэу зыхуей хъу нэгъуэщIхэмкIэ сату зыщI тыкуэнхэм.
Абы къыдэкIуэу, щIыналъэхэм я унафэщIхэм,  езыхэм  я  деж щы­щыIэ щытыкIэм елъытауэ, санитар дохутырхэм я чэнджэщхэм тету, ­хуитыныгъэ яIэщ УФ-м и Прави­тельствэм гурыIуэу IуэхущIапIэхэм  я лэжьыгъэр нэсу зэтрамыухуэжы-ну е иджыри пIалъэ гуэркIэ ахэр ирамыгъэжьэжыну.
Узыфэм земыгъэубгъуным нэ­гъэсауэ хуэхьэзыру щытынымкIэ ­хабзэр иджыри яхуэгъэзащ зи ныбжьыр илъэс 65-рэ ирикъуахэм, апхуэдэуи  уз  гъэтIылъахэр зиIэхэм.
Къэралым и УнафэщIым интер­натхэм, жьыкIэфэкIэхэр щапIыж унэ­хэм я лэжьыгъэм гулъытэ хэха хуащIыпхъэу къигъэуващ, абыхэм щыIэхэм  я  ныбжьыр  зэрыхэкIуэ-там, уз гъэтIылъахэр зэраIэм щхьэ­кIэ нэхъ набдзэгубдзаплъэу якIэ­лъып­лъын зэрыхуейм къыхэкIыу. Егъэзауэ лэжьэн хуей зэрыхъум, ­гугъуехь куэд зэратещIэм къыхэ­-кIыу социальнэ IуэхущIапIэхэм я ­лэ­жьакIуэхэм я улахуэхэм федеральнэ ахъшэ хэхахэри мазищкIэ ­ху­щIагъун хуейуэ Путин Владимир ­игъэуващ.
Президентым и унафэкIэ, апхуэ-дэу ахъшэкIэ зыщIагъэкъуэнущ ­сабий зиIэ унагъуэхэми. Нэхъ пасэу хэ­IущIыIу ящIауэ зэрыщытащи, цIыхур псэун папщIэ нэхъ мащIэ дыдэу зыхуейм хуэдиз цIыху къэс хуэзэу зыIэрымыхьэ унагъуэ хуэ­-     мы­щIахэм ис, зи ныбжьыр илъэси- щым къыщыщIэдзауэ илъэсибл ирикъуа сабийхэм зэрадэIэпыкъу ахъшэр мэкъуауэгъуэм и 1-м къы­щыщIэдзауэ къыдахын папщIэ ­дэф­тэрхэр зэрагъэпэщ хъунущ. ­Лъэ­Iу тхылъхэр ятмэ, адэ-анэхэм мэ­­къуауэгъуэм зэуэ къаIэрыхьэжынущ дызэрыт гъэм и япэ илъэс ны­къуэм къратын хуея ахъшэр.
КъимыдэкIэ, коронавирус узы-фэм гугъуехьхэр къызэришам къы­хэкIыу, илъэсищым къыщыщIэ-         дзауэ илъэс пщыкIух хъу дэтхэнэми сом мин пщIырыпщI иратыну ягъэуващ, абыхэм я адэ-анэхэм я хэ­хъуэм, лэжьапIэ яIэ-ямыIэм емылъытауэ. Илъэсищ иримыкъуахэм хущIагъу ахъшэр зэрат щIыкIэми зэхъуэ­кIыныгъэ халъхьащ. Сом мин тху­рытху зратынур анэм и мылъкур зыхуагъэувахэм я закъуэкъым, атIэ илъэсищ иримыкъуа сабий зыщIэс унагъуэ псоми апхуэдэ ахъшэ ­иратынущ. Абы папщIэ адэ-анэм е сабийм  кIэлъыплъыну  зи  пщэ далъ­хьам электроннэу лъэIу тхылъ итын хуей къудейуэ аращ.
Апхуэдэуи хуэдитIкIэ хагъэхъуащ сабийм ират пособие нэхъ мащIэ дыдэм. Псори зэхэту дэIэпыкъуныгъэ ягъуэтынущ урысей сабий мел­уан 27-м: сабий цIынэхэм я деж къыщыщIэдзауэ школакIуэхэри ­хиу­быдэу.
Къэралым и УнафэщIым къищта унафэм ипкъ иткIэ зыдэIэпы­къунухэм ящыщщ экономикэмрэ хэ­щIыныгъэ зыгъуэта IуэхущIапIэ­хэмрэ. Путин В. В. хьэрычэт IэнатIэм зэрызыщIагъэкъуэну мардэщIэ ­игъэуващ - хэщIыныгъэ зыгъуэта ­IэнатIэхэм хыхьэ IуэхущIапIэхэм я лэжьакIуэхэм улахуэхэр иратын ­папщIэ абыхэм я унафэщIхэм ­ху­хахынущ процентитI фIэкIа зы­-           те­мыхуэ щIыхуэхэр, ахэр 2021 гъэм и мэлыжьыхь пщIондэ япшыныж ­хъунущ. А зэманым къриубыдэу IуэхущIапIэм и лэжьакIуэхэм я процент 90-р ихъумэфмэ, щIыхуэри абы ­техуа процентри зэрыщыту къэралым хуипшыныжынущ. ЛэжьакIуэхэм я процент 80-р хуэ­хъумэмэ, ахъшэм и зэхуэдитIыр къэ­ралым ­хуитыжынущ. ХэщIы­ныгъэ зыгъуэта IэнатIэхэм хыхьэ IуэхущIапIэхэм я унафэщIхэм ягъэ­лажьэхэм улахуэхэр иратын папщIэ нэхъ пасэу ягъэувауэ щытащ процент зыте­мыхуэ щIыхуэхэр, ап­хуэ­дэуи лэжьапщIэ нэхъ мащIэ дыдэу зэрыз лэ­­­­жьакIуэ къэс хуэзэу хуха­хыну.
Хьэрычэт IэнатIэ мыинымрэ курытымрэ, фейдэ къегъэщIыным пымыщIа зэгухьэныгъэхэм хэтхэм 2020 гъэм и мэлыжьыхьым, накъыгъэм, мэкъуауэгъуэм ятын хуея налогхэмрэ (НДС-м нэмыщI) страховой взносхэмрэ щхьэщахащ. Абы щIигъэбыдэнущ ахъшэхэр щатыжын хуея пIалъэхэр хуагъэIэп­хъуэным хуэунэтIауэ нэхъ пасэу къыхалъхьауэ щыта Iэмалхэр.
Урысейм и цIыхухэу я щхьэ хуэ­лэжьэжу зезыгъэтхауэ щытауэ къахэхъуэм техуэ налогыр зытахэми гулъытэ щхьэхуэ хуащIынущ. Абы- хэм 2019 гъэм ята ахъшэр Президентым и унафэкIэ иратыжынущ, апхуэдэуи «налог мылъку», улахуэ нэхъ мащIэ дыдэу ягъэувам хуэдиз хъууэ, иратынущ.