1941 - 1945 гъэхэм екIуэкIа Хэку зауэш­-хуэм къыщытхьа ТекIуэныгъэр илъэс 75-рэ щрикъу махуэм, накъыгъэм и 9-м, Къэбэрдей-Балъкъэрым и Iэтащхьэ КIуэ­кIуэ Казбек, а зауэм хэкIуэдахэм я фэеплъым пщIэ зэрыхуищIыр къигъэлъагъуэу, удз гъэгъахэр трилъхьащ Налшык къалэм щыIэ «ЩIыхьым и МафIэ Мыужьых» мемориалым.

А Iуэхум апхуэдэу хэтащ КъБР-м и Парламентым и УнафэщI Егоровэ Татьянэ, ­республикэм и Правительствэм и Тхьэмадэ ­Мусуков Алий, КъБР-м щыIэ федеральнэ инспектор нэхъыщхьэ Мэкъуауэ Тимур.
ТекIуэныгъэм и махуэр гъэлъэпIэным ­теу­хуауэ яубзыхуауэ щыта гуфIэгъуэ дауэдапщэхэр ягъэIэпхъуащ, коронавирус узы­фэ зэрыцIалэм зэрызиубгъум и зэранкIэ мар­дэхэр ягъэувын хуей зэрыхъуам къых­э­кIыу.
А махуэм Налшык къалэм Лениным и цIэр зезыхьэ и уэрамым сыхьэт 18-рэ дакъикъэ 45-м щIидзэу къыщатащ Урысейм и Президент Путин Владимир цIыхухэм зэрехъуэхъуар. Сыхьэт 19.00-м цIыхухэр щыму хуэщыгъуащ фашизмэм ебэну зи псэр зытахэм. Зы дакъикъэ дэкIри, зылъэIэс псори къызэщIиIэтэу къэIуащ ма­хуэшхуэм и дамыгъэ хъуа, псоми фIыуэ ялъагъу «ТекIуэныгъэм и Махуэ» уэрэдыр. ЦIыхухэр абы дежьууащ я унэхэм щIэсу, «Полк уахътыншэ» онлайн-акцэм хэту.
1941 - 1945 гъэхэм екIуэкIа Хэку зауэш­хуэм къыщытхьа ТекIуэныгъэр илъэс 75-рэ щрикъу гуфIэгъуэ махуэр гъэлъэпIэ-ныр иухащ, Налшык щагъэлъэта хьэ­рэ­кIытIэ зэмыфэгъухэм уафэр дахащэу къы­зэ­щIагъаблэри.