Къэбэрдей-Балъкъэрым и Iэтащхьэ КIуэкIуэ Казбек видеозэпыщIэныгъэ Iэмалхэм тету дыгъуасэ иригъэкIуэкIащ республикэм мэкъумэш лэжьыгъэхэр щегъэкIуэкIыным теухуауэ щыта зэIущIэр. Абы хэтащ КъБР-м и Правительствэмрэ Iуэхур зэхьэлIа министерствэмрэ я унафэщIхэр, щIыналъэ, къалэ округхэм я администрацэхэм я Iэтащхьэхэр.
Зытепсэлъыхь Iуэхум и щытыкIэр зэпкърихыу доклад ищIащ КъБР-м мэкъумэш хозяйствэмкIэ и министр Сыжажэ Хьэсэн. Абы къыхигъэщащ адрей илъэсхэм елъытауэ гъатхэр мы гъэм зэрынэхъ хуабэм ипкъ иткIэ губгъуэ лэжьыгъэхэм нэхъ пасэу зэрыщIадзар икIи яубзыхуа лэжьыгъэхэр и пIалъэм къызэритIасэр. Нэгъабэ елъытауэ сэгъуэр нэхъ псынщIэу йокIуэкI. Ар щызэфIагъэкIащ гектар мин 209-м, ар мардэм и процент 90 мэхъу. 2020 гъэм гъавэр гектар мин 282-м трасэну траухуащ. ЕужьэрэкIыу йокIуэкI жыгхэр хэсэнри, а лэжьыгъэр гектар 1200-м щызэфIэкIащ (я мурадам и проценти 104,3-рэ мэхъу). Апхуэдэуи агрохимие Iуэхухэри ирагъэкIуэкI: щIыгъэпшэрхэр халъхьэ, узыфэхэмрэ удз ежьужьхэмрэ зэребэнхэр къагъэсэбэп, къэкIыгъэхэр уэм щыхъумэным хуэунэтIа лэжьыгъэхэми я нэIэ тетщ.
ЖылэхэмкIэ, я нэхъыбапIэкIэ ди къэралым къыщагъэхъуауэ, ирикъуу къызэгъэпэщащ, мэкъумэш техникэуи, минеральнэ щIыгъэпшэруи, гъэсыныпхъэуи зыхуэныкъуэм хуэдиз иIэщ республикэм.
Коронавирус узыфэм зыщиубгъу мы лъэхъэнэм мэкъумэш IэнатIэм и IуэхущIапIэхэми щытетщ санитар-эпидемиологие щытыкIэм ипкъ иткIэ ягъэува мардэхэм.
Гъатхэ губгъуэ лэжьыгъэ нэхъыщхьэхэр накъыгъэм ику пщIондэ зэфIагъэкIыну я мурадщ.
ЩIыналъэм и мэкъумэшыщIэхэм я дежкIэ икъукIэ щIэгъэкъуэнышхуэщ къэралыр мылъкукIэ къазэрыдэIэпыкъур. КъБР-м Мэкъумэш хозяйствэмкIэ и министерствэм къызэритымкIэ, мэкъумэш-промышленнэ комплексым зыщIэгъэкъуэнымрэ къуажэ щIыпIэхэм зегъэужьынымрэ трагъэкIуэдэну бюджет мылъкуу хухахар мы гъэм процент 13-кIэ нэхъыбэ мэхъу икIи абы сом меларди 2,3-рэ хуэзэу яубзыхуащ. Абы апхуэдэу къызэщIеубыдэ инженер инфраструктурэм зегъэужьынри, къуажэхэм я теплъэхэр егъэфIэкIуэнри, къащта щIыхуэхэм техьэ процентхэр тыжынри, илъэс куэдкIэ къэкI къэкIыгъэхэр хэсэнымрэ ахэр зехьэнымри, къуажэдэсхэм я псэупIэхэр егъэфIэкIуэнри.
IуэхущIапIэ мыинхэм зыщIагъэкъуэн мурадкIэ къыIах лэжьэн щIэзыдзагъащIэ фермерхэм, унагъуэ фермэхэм, кооперативхэм зэрадэIэпыкъуну, апхуэдэуи къуажэхэм кооперацэм зыщегъэужьыным хуэунэтIа грантхэмрэ субсидиехэмрэ къызэрыдахыну тхылъхэр. Iэщ гъэхъуным елэжьхэм апхуэдэ тхылъхэр къыIахын щIадзэнущ накъыгъэм и кIэм къыщыщIэдзауэ.
КъБР-м и Iэтащхьэм къыхигъэщащ мылъкур зыхухахахэм икIэщIыпIэкIэ яIэрыхьэным мыхьэнэшхуэ зэриIэр.
ЗэIущIэм щхьэхуэу щытепсэлъыхьащ республикэм хуэмыщIауэ щыпсэу унагъуэхэм защIэгъэкъуэным хуэунэтIа лэжьыгъэр зэрекIуэкIым.
Мы зэманым ирихьэлIэу КъБР-м Лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министерствэм и къудамэхэм, муниципалитетхэр, дин лэжьакIуэхэр, хьэрычэтыщIэхэр я щIэгъэкъуэну, апхуэдэуи «Медицинэ лэжьакIуэ-волонтёрхэр» Урысейпсо жылагъуэ зэщIэхъееныгъэм и щIыналъэ отделенэм, Урысейпсо цIыхубэ фронтым КъБР-м щиIэ IуэхущIапIэм я лIыкIуэхэм Къэбэрдей-Балъкъэрым щыпсэу унагъуэ хуэмыщIахэм, зи закъуэу псэу жьыкIэфэкIэхэм, зи щхьэ Iуэху зезымыхуэжыфхэм хуашащ ерыскъыпхъэхэр зэрылъ Iыхьэ мин 60 хуэдиз. ЩIыналъэм и Iэтащхьэм фIыщIэ яхуищIащ а Iуэху щхьэпэм хэта псоми.
