Правительствону юйюнде Къабарты-Малкъарны Башчысы Юрий Коков Халкъла аралы черкес ассоциацияны таматалары эмда 19 сентябрьде Нальчикде ачылгъан  МЧА-ны конгрессини келечилери бла тюбешгенди. Анга МЧА-ны президенти Хаути Сохроков, адыг поэт, Адыгеяны, КъМР-ни, КъЧР-ни халкъ жазыучусу, СССР-ни, Россейни адабият эм искусство жаны бла  Къырал саугъаларыны лауреаты, жамауат къуллукъчу Исхак Машбаш, МЧА-ны вице-президентлери Реджами Бурса, Арфан Барсик, МЧА-ны исполкомуну келечилери Умит Динчер, Мухаммад Хакуз, Зухер Тхаухо, Иорданияны келечиси  Зухдий Джанбек, Кавказ обществоланы европа федерациясыны председатели Эртан Дышек, Кавказ обществоланы  европа федерациясыны келечиси Маиса Шора къатышхандыла.
Европаны, Тюркню, Израильни, Иорданияны, Сирияны адыг организацияларыны таматалары  бир ата журтлула жашагъан жерледе аланы турмушларын билдиргендиле, миллет энчиликлерин, адыг этносну сакъларгъа аталгъан ишлени юсюнден хапарлагъандыла. Къабарты-Малкъарны юсюнден айта, конгрессни делегатлары мында миллетле аралы келишиулюк бийик даражада болгъанын, социал-экономика жаны бла жетишимлени, жашау болумланы игилендирир ючюн бардырылгъан жумушланы тап къуралгъанларын белгилегендиле.  
КъМР-ни Башчысы  халкъла аралы черкес организацияланы  алчыларына салыннган борчланы терен ангылагъанлары ючюн ыспас этгенди, адыг повестканы магъаналы ызларын бардыргъанда мындан арысында да байламлыкъда  ишлеуню магъаналылыгъын  энчи белгилегенди.