КъБР-м и Iэтащхьэ КIуэкIуэ Юрий дыгъуасэ иригъэкIуэкIащ Правительствэм и зэIущIэ.
Абы хэта къулыкъущIэхэр тепсэлъыхьащ 2018 гъэм и мазибгъу блэкIам къриубыдэу экономикэм, мэкъумэшым, ухуэныгъэм теухуауэ республикэм зэфIигъэкIамрэ зыхунэмысамрэ.
КъБР-м и Правительствэм и унафэщI Мусуков Алий къыхигъэщащ 2017 гъэм елъытауэ, проценти 6-кIэ нэхъыбэ гъавэ мы гъэм къызэрырахьэлIэжынур, хадэхэкIми и Iуэхур зэрымыIейр:
- Ди къарур зэрыщыту хуэдунэтIащ гъавэ Iухыжынымрэ ухуэныгъэмрэ. Ноби бжыгъэ гуэрхэр къэзгъэлъэгъуэфынущ, ауэ пыухыкIауэ ахэр зыхуэдэр щыжытIэфынур фокIадэ мазэм и кIэращ, - жиIащ абы.
Мусуковым зэрыжиIамкIэ, къэрал мылъкум щыщу республикэм къыIэры-хьа сом мелард 19,5-м и процент 70-р цIыхухэм я псэукIэр егъэфIэкIуэным, пенсэм, улахуэм, егъэджэныгъэмрэ страхованэмрэ текIуэдащ.
- Республикэм къигъэсэбэпам нэхърэ къыхэхъуар сом мелард 1,5-кIэ нэхъыбэщи, догугъэ КъБР-м щIыхуэу телъым щыщи хэттыкIыжыфыну, - игъэбелджылащ абы.
КъБР-м и Правительствэм и УнафэщIым и япэ къуэдзэ КIэрэф Мурат къызэрыхигъэщамкIэ, 2019 гъэм и бюджетыр мыгувэу зэхагъэувэнурэ Парламентым ирагъэхьынущ.
Къэбэрдей-Балъкъэрым и Правительствэм и УнафэщIым и къуэдзэ - мэкъумэш IэнатIэмкIэ министр Говоров Сергей жиIащ нэгъабэ елъытауэ зэрынэхъыбэр гъавэу кърахьэлIар икIи ар щахъумэну гъэтIылъыпIэ ин зэраухуэр.
- Гъавэ хъумапIэм тонн мин 94,6-рэ щIэхуэу арати, иджыри тонн мин 24,7-рэ хуэдиз зыщIэзэгъэн къедгъэжьащ, етIанэгъи апхуэдэ зы дыухуэну ди мурадщ. Нобэрей махуэр къапщтэмэ, фIэIугъэ зэмылIэужьыгъуэу банкI мелуан 222,4-рэ хьэзырщ, хэхъуащ лыуэ, гъэшхэкIыу, джэдыкIэу къетхьэлIам и бжыгъэм.
Министрым къипсэлъам теухуауэ КъБР-м и Iэтащхьэм къыхигъэщащ куэдагъым и закъуэ мыхъуу, ерыскъыпхъэхэм я фIагъми кIэлъыплъын зэрыхуейр:
- Тонн мелуан бжыгъэкIэ къетхьэлIэ ерыскъыпхъэм зыри и мыхьэнэкъым, къэралым щагъэбелджыла мардэхэм къемызэгъмэ. Ди гъунэгъу щIыналъэхэм япэ димыщмэ, дакъыкIэрыху хъуну-къым. Абы папщIэ фызыхуэныкъуэ псо-ри фиIэщи, фIыкIэ дакъыхэщын хуейщ, - жиIащ КIуэкIуэ Юрий.
Гъэсыныпхъэ уасэр къызэрыхахым теухуауэ къэпсэлъащ КъБР-м и Прави- тельствэм и унафэщIым и къуэдзэ Бэлэтокъуэ Владимир. Абы жиIащ гъэсыныпхъэ уасэр къэзытхэм я бжыгъэр проценти 10-кIэ зэрыхэхъуар икIи ар процент 76-м зэрынэсар. КъулыкъущIэм жиIащ щIыIэр къэмыс щIыкIэ, унэхэм хуабэр къызэрекIуалIэ бжьамийхэр зыхуей зэрыхуагъэзэнур.
- Мы Iуэхум гулъытэ хэха хуэфщIыну сыхуейт, - жиIащ КIуэкIуэм. - Хуабэр махуэ пыухыкIа гуэрым ирихьэлIэу къаутIыпщу аращ. Тэмэмкъым балигъи сабии сымаджэ хъуху уежьэну. ЩIыIэмэ - псори унэ хуабэ щIэсын хуейщ.
Республикэм щрагъэжьа ухуэныгъэхэми щытепсэлъыхьащ зэIущIэм. Я гугъу ящIащ 2012 гъэм Налшык щрагъажьэу намыгъэса спорт унэм, Наркъалэрэ Налшыкрэ щаухуэ школыщIэхэм, къуажэхэм дащIыхь щэнхабзэмкIэ унэхэм я Iуэхур зытетым. Абы тепсэлъыхьащ КъБР-м и Правительствэм и Унафэ- щIым и къуэдзэ Къардэн Мурат, ухуэныгъэмрэ псэупIэ-коммунальнэ IэнатIэмкIэ министр Къуныжь Вячеслав, щэнхабзэмкIэ министр Къумахуэ Мухьэдин сымэ.
ЗэрыжаIэмкIэ, спортым и унэр нагъэсыжыным хухаха мылъкум щыщу сом мелуан 62,307-р къагъэсэбэпащ, лэжьыгъэр мэкIуатэ. КъищынэмыщIауэ, Нарткъалэ дащIыхьа школыщIэр ятынущ дыгъэгъазэ мазэм, Налшык къалэ къыщрагъэжьа еджапIэщIэри и чэзум нагъэсынущ.
- Европэм и курыт еджапIэхэр къызэрызэгъэпэщам хуэдэу, иджырей зэманым екIуу зэщIэузэдауэ щытын хуейщ а школхэр, - жиIащ КъБР-м и Iэтащхьэм.