Миллетибизде озгъан шабат кюнню сакъламагъан хазна адам болмаз эди арт эки-юч айны ичинде. Ол кюн Тюменланы Альберт къатыш сермешлени АСВ организациясыны бел бауу ючюн кюрешип, аны алыргъа таукел атлагъан эди.
Энди «Тюрк» деген ат бла демлешген жашыбызгъа билеклик этерге уа Краснодар шахаргъа 8 сентябрьде жюзле бла адамла тебиреген эдиле. Жырчыларыбыз, тепсеучюлерибиз, спортчуларыбыз эм дагъыда башхала Тюмен улуну суратын машиналарында окъуна ишлетип, жолгъа чыкъгъандыла. Анда да тюбешиу башланырдан алгъа жашла тепсеуле къурап, халкъыбызны атын айтдыргъандыла.
Сёз ючюн, «Балкария» ансамблибизни солисти Къудайланы Ахматха «Баскет Холлну» аллында жыйылгъан хар инсан да къарс ура эди. Кавказ халкъланы келечилери бу турнирде аслам болгъандыла. Къарачай-малкъар, чечен, адыг миллетлени адамлары да кеслерин шуёхлукъ халда жюрютгендиле.
Къабарты-Малкъардан бу эришиуге Тюмен улудан сора да, Азамат Керефов, Мухамед Коков эм Али Багов къатышхандыла. Аладан экиси республикагъа бел баула бла къайтхандыла.
Турнир ингирде сагъат алтыда башланнганлыкъгъа, Альбертни бла Али Баговну тюбешиулерин эришиуню ахырына салгъан эдиле. Аны себепли Тюмен улуну хорламын кёрюрге сюйгенлеге уа кече сагъат бирге дери сакъларгъа тюшгенди. Ол а миллетни 90 проценти эди деп таукел айтыргъа боллукъду.
«Тюрк» да ол жууаплылыкъны сезе, халкъны къууандыргъанды. Сермешни ючюнчю кесегинде ол Сиро Родригесни болжалдан алгъа хорлайды. Болсада ары дери бразилиячы аны сермеп тюбюне ургъанда, бир кесек къайгъылы болгъанбыз. Алай Альберт артда интервьюсунда айтханнга кёре, Сиро аякъларын бир аз бошларын сакълап тургъанды.
Сора тюз ол такъыйкъаны сезгенлей а, аны тюбюнден чыгъып, сермешни кеси сюйгенича къурайды. Жерлешибизни ауур жундурукълары бразилиячыны онгсуз этгенден сора, судья кесин аланы араларына атып, раундну тохтатады.
Ол а таулу жаш муратына жетип, бел бау къоллу болгъаныны белгиси эди. Аны бла бирге уа битеу залдагъы таулула да къууаннгандыла. Ана тилибизде сюйюнюуюн билдире, жашла Альберт, Альберт, деп къычыргъандыла. Къобуз бла дауурбас таууш а аладан да уллу эшитилгенди.
Сахнагъа АСВ-ни 77 килограмм ауурлукъда чемпион бла бирге атасы Хусей да чыкъгъанды. Альберт бел бауну аны инбашына салгъаны, анга ыразылыгъыны белгиси эди дерге боллукъду.
Ыйых кюнню ингиринде уа Нальчикге кирген жерде Альбертге къууанчлы халда тюбегендиле. Уллу, гитче да 100-ге жууукъ машинада аны аллына баргъандыла. Ол жетгинчи уллу той къуралгъанды.
Ызы бла кортеж Къулийланы Къайсын атлы орамдагъы Маданият юйню аллына келгенди. Алайда уа алагъа майдан толу бир адам хычинле эмда айран бла тюбегендиле. Байрамны жырчы эм журналист Атталаны Азнор бардыргъанды. Жыйылгъанланы алларында бу жумушну къурагъанладан бири Хасания элни башчысы Азаматланы Къайсын, Бабугент элни таматасы Османланы Мухтар эм дагъыда башхала сёлешгендиле. Ызы бла Альберт атасы бла бирге аланы сыйларын кёрюрге келгенлеге жюрек ыразылыкъларын билдиргендиле.
- Былайда тиширыула, ууакъ сабийле да болгъанларын кёреме. Аллах ыразы болсун мени ючюн келгенигизге! - дегенди Альберт.
Чемпионну хурметине Газаланы Алим жырлагъанды, «Балкария» ансамбльни артистлери да тепсегендиле. Адамланы уа Тюмен улу бла суратха тюшер онглары да болгъанды. Келю кётюрюлген халкъ, заман кеч болгъанына да къарамай, майдандан кетерге ашыкъмагъанды. Аны себепли къууанч иги кесекге дери созулгъанды.
