Кёнделенчи къызчыкъ-ахшыланы санында![]() Бу кюнледе «Къагъыт жазыуну эм ахшы дерси – 2026» атлы Битеуроссей эришиуню эсеплери чыгъарылгъандыла. Эм ахшылагъа уа 35 окъуучу эмда 6 устаз саналгъандыла. Бу конкурсну ал кезиулериден башлап ахыр урумуна дери уа анга Калининграддан Камчаткагъа дери битеу къыралдан да мингле бла адамла къатышхандыла. Алай бла, Къабарты-Малкъарны Кёнделен элини Энейланы Тимур атлы 4-чю номерли битеулю билим берген мектебини тогъузунчу классыны окъуучусу Тюбейланы Альфия эришиуню «Тарихли дунияда адамланы араларында байламлыкъла алай магъаналы нек болгъанларыны юсюнден тенгинге къагъыт жаз» деген бёлюмюнде лауреат болгъанды. Къызчыкъны уа анга устаз Отарланы Жамиля Хусейевна хазырлагъанды. Альфия уа бюгюнлюкде, нейросетьлени бла IT-технологияланы айныуларына уллу магъана берилген жашауда, жюрек жылыуну, адамла бла бетден-бетге сёлешиуню, ушакъ бардырыуну сакъларгъа кереклисини, бу ышанланы, къыйматланы бир тюрлю гаджет да алышалмазлыгъыны юсюнден жазгъанды. Мектепни завучу Улакъланы Марина Магометовна чертгенича, къагъытда къол бла жазылгъан письмо адамны сезимлерин бегирек ачыкълагъанын, аны юсю бла жазгъан инсанны хатын, жазыу стилин да кёрюрге, ангыларгъа боллукъду. Аны уа сабийлеге тюшюндюрюуню магъанасы да уллуду. Эришиу къырал даражада къуралып, бардырылып да келгенли энди 24 жылдан атлагъанды. Андан бери уа анга 2,6 миллиондан аслам окъуучу къатышханды. Аны къурагъанла уа: Россейни Почтасы, Россейде связьда уруннганланы профсоюзлары, Москваны Михаил Ломоносов атлы къырал университети, Россейни Жазыучуларыны союзу эмда РФ-ни Къоруулау министерствосу. Россейни халкъаларыны бирликлерини жылында уа аны «Барды аллай усталыкъ – Ата журтну къоруулау…», «Насыплы юйюрню юлгюлери», андан сора да, «Биз туугъанбыз жомакъны керти этер ючюн!» деген бёлюмлерине энчи эс бурулгъанды. Россейни Президенти Владимир Путин 2012 жылда окъуна почталы эришиуге бийик багъа берген эди: «Быллай сейир, бюгюннгю жашауда керек болуп тургъан, кертиси бла да ариу проектни башламчыларына энчи халда билдирирге сюеме ыразылыгъымы. Быллай инсан, жамауат жангычылыкъла сабийлеге кеслерине ышаныргъа, кючлерин, онгларын да сезерге, чыгъармачылыкъ жаны бла илхамларын къозгъаргъа да себепликдиле. Айхай да, къыралыбызны ёсюп келген тёлюсюн патриот, ачыкъ ниетли халда юйретиуде да уллу магъананы тутадыла». Чыгъармачылыкъ проект бир бирге къагъыт жазыу (эпистолярный) жанрны сакъланыууна эмда айныууна да себеплик этеди. Жаш адамланы эслерин юйюр къыйматлагъа, ана тилни магъанасына, тарых энчиликлеге, халкъланы араларында сакъланып келген шуёхлукъгъа да бурады. Быйыл Россейни Почтасы Социал-маданият башламчылыкъланы фонду бла биргеликде «Магъаналы затланы юслеринден сабийле жазгъан къагъытла. Бирликдеди бизни кючюбюз» деген ат бла жылны белгисине аталгъан китапны басмалагъандыла. Ол а эришиу бардырылгъанлы бери анга къатышханланы жазгъан къагъытларындан жарашдырылгъан онекинчи изданияды. Саулай да алып айтханда уа, чыгъармачылыкъ конкурсха къатышханланы ишлери бла 24 китапдан «Неден башланады Ата журт? Магъаналы затланы юслеринден сабийле жазгъан къагъытла» деген ат бла сейир китапхана къуралгъанды. Аны тиражы уа 48 минг болгъанды. «Мени юйюмде амур къаплан жашайды» дегени уа «Жылны китабы» Миллет эришиуде лауреат даражагъа тийишли болгъанды. Китапханадан эки изданияны уа россейли космонавтла кёкге учхан кезиулеринде окъуна биргелерине алгъан эдиле. «Къагъыт жазыуну эм ахшы дерси» Битеуроссей эришиуню «Россейни эм ахшы социал проектлери» атлы бериу да аны программаны «Фахмулу сабийлеге эмда жаш тёлюге тутхучлулукъ этиу» деген кесегини эм ахшы социал проектине санагъанды. Эришиуню жюриси таулу къызчыкъ Тюбейланы Альфияны технологияла кечеден тангнга айный баргъан дунияда адамланы араларында ачыкъ ниетлиликни, байламлыкъны магъанасын ангылагъанын, ол ангылауун бирсилеге да кёргюзте билген ышанын чертгенди эмда, белгилегенибизча, аны лауреат даража бла саугъалагъанды. Трамланы Зухура хазырлагъанды.
Поделиться: ЧИТАТЬ ТАКЖЕ:
| ||||||||||||||||









