Кёнделеннге кирген жерде «Бушуулу таулу» эсгертмени тёгереги тынгылы жангыртылгъанды, деп билдиредиле Къабарты-Малкъарны Къурулуш эм ЖКХ министерствосундан.
Ол Уллу Ата журт урушдан къайтмай къалгъан жерлешлерибизге жораланнган эсгертмеди. Эллилеге, башха бирибизге да магъаналыды. Жангыртыу ишлени кезиуюнде аны аллында майданчыкъгъа эмда анга элтген жолчукълагъа асфальт жайгъандыла, плитка салгъандыла эмда бордюр ташла орнатхандыла, тёгерегин а ариу буруула бла бегитгендиле.
Эсгертме кече да иги кёрюнюрча, аны аллында чыракъла орнатхандыла, алайгъа келгенле олтуруп солурча шинтикле тизгендиле, тазалыкъгъа эс буруп, энчи орунла да салгъандыла.
Ол маданият тарыхны даражасын тутхан объектди, дегендиле министерствода. Кеси да Уллу Ата журт урушну кезиуюнде фронтха бу элден кетген минг бла жарымдан артыкъ адам этген кишиликни белгисиди. Жангыртыу ишле «Тап шахар болумну къурау» къырал проектни чеклеринде бардырылгъандыла.
Улбашланы Мурат
хазырлагъанды.