Кулиев Къайсын и цIэр зезыхьэ уэрамым тет Модельнэ библиотекэм щекIуэкIащ Донецк, Луганск республикэхэр, Запорожскэ, Херсон областхэр Урысей Федерацэм къызэрыгухьэжам теухуа зэIущIэ.
ФокIадэм и 30-м ди къэралым щагъэлъапIэ ар. 14-нэ курыт еджапIэм и 10-нэ классым щеджэхэр, я класс унафэщI Ахэмын Iэсият я гъусэу, хэтащ Iуэхум. Къэралым махуэшхуэр щIыщагъэлъапIэм тепсэлъыхьыну ирагъэблэгъат «Знание» урысей зэгухьэныгъэм и лектор, урысейпсо цIыхубэ фронтым и координатор Галинский Ярослав. Ар ныбжьыщIэхэм яхутепсэлъыхьащ 2022 гъэр Урысейм и тхыдэ напэкIуэцIхэм зэрыхэувам, зэкъуэтыныгъэм и мыхьэнэм. Урысейм и иджырей тхыдэм теухуауэ ныбжьыщIэхэр куэдым щIэупщIащ. Галинскэм абыхэм жэуап яритащ икIи къыхигъэщащ дэтхэнэми къэралым жэуап зэрыщихьыр, Хэку лъагъуныгъэр я гум ирагъэлъын зэрыхуейр.
ЩэнхабзэмкIэ Вэрокъуэ Владимир и цIэр зезыхьэ фондми щекIуэкIащ а Iуэхум теухуа пшыхь. Абы къеблэгъащ ветеранхэр, жылагъуэ лэжьакIуэхэр, «Хэкум и хъумакIуэхэр» фондым и щIыналъэ къудамэм хэтхэр, щIалэгъуалэр. Дзэ Iуэху хэхам и ветеран, лейтенант Мамбэт Къамболэт, дзэ Iуэху хэхам ротэм и командиру щыIа, капитан Iэрыпщыэ Замир сымэ. Ахэр тепсэлъыхьащ Урысейм щыщ хъужа щIыналъэщIэхэр ди къэралым къызэрыгухьэжам фIы къазэрыхуихьам. Хэку лъагъуныгъэм, дзэ Iуэху хэхам хэтхэм я лIыгъэм, къэралым и напэкIуэцIыщIэм тепсэлъыхьащ Дунейпсо Адыгэ Хасэм и тхьэмадэ Сэхъурокъуэ Хьэутий.
Пшыхьым щагъэлъэгъуащ Вэрокъуэ Владимир трихауэ щыта «Заоблачный фронт» фильмыр. Нэхъыжьхэмрэ щIалэгъуалэмрэ тепсэлъыхьыжащ абы.
Дзэлыкъуэ районым и библиотекэхэми щагъэлъэпIащ фокIадэм и 30-р. «Зэкъуэтыныгъэм тхыдэр и лъабжьэу», «Зы къэрал! Зы унагъуэ! Зы Урысей!», «Урысейм щыIэ зэкъуэтыныгъэ», «Зы къэралым – зы къэкIуэн!», «Ди щIыналъэхэр» зи фIэщыгъэ Iуэхухэм щытепсэлъыхьащ къэралым и цIыхухэм я зэкъуэтыныгъэм, тхыдэ напэкIуэцIхэм, 2022 гъэм къэхъуа Iуэхугъуэр Урысейм и тхыдэм зэрыхэувам, дзэ Iуэху хэхам щыIэхэр зэрыт лIыгъэщIапIэм, нэгъуэщIхэми. ЗэIущIэхэр къызэрагъэпэщащ а Iуэхугъуэм ехьэлIа тхылъ гъэлъэгъуэныгъэхэмкIи.
Тэрч районым дэт ЩIалэгъуалэ центрым къыщызэрагъэпэщащ Урысейм и тхыдэ напэкIуэцIым хэува махуэшхуэм хухаха зэIущIэ. ЩIалэгъуалэм епсэлъэну ирагъэблэгъащ дзэ Iуэху хэхам хэта Уэркъуасэ Анатолэ, подполковник ДыщэкI Артур, дзэ Iуэхухэм я ветеран Хъаний Хьэсэнбий, полковник, Урысейм и ДОСААФ-м Тэрч районым щиIэ и къудамэм и унафэщI Щомахуэ Арсен. ЗэIущIэр къызэIуахащ Урысей Федерацэм, Къэбэрдей-Балъкъэрым я гимнхэмкIэ. Абы щытепсэлъыхьащ къэралым и тхыдэм, ди зауэлIхэм я лIыгъэм, зэкъуэтыныгъэм, Хэку лъагъуныгъэм я къарум.
ГУГЪУЭТ Заремэ.
