РФ-ни Къырал Думасыны Жыйылыуунда «Школгъа дери билим бериу Олимп» атлы мектепге дери окъутууда уруннганлагъа саугъаны бериу бла байламлы хычыуун жумуш да къуралгъанды. Саугъаны «Школгъа дери билим бериуню айнытыугъа къошумчулукъ ючюн» деген бёлюмюнде аллай даражагъа КъМКъУ-ну педагогика, психология эмда физкультура-спорт билим бериу институтуну доценти Римма Багова да тийишли болгъанды. Мектепге дери окъутууну жылыны чеклеринде бардырылгъан жыйылыу саулай къыралдан эм ахшы юйретиучюлени, сабий садланы таматаларын, алимлени эмда специалистлени бирикдиргенди.
Университетибизни келечиси Римма Багова бусагъатда окъуучуланы психикалы айныулары бла байламлы бардыргъан терен магъаналы тинтиулери бла белгилиди. Андан сора да, ол бу жаны бла ишлегенлени усталыкъларын ёсдюрюу эмда ала ишлеген жерлеринде стрессни сынамазча амалланы хайырланыу бла байламлы программаны къурагъанды.
- Бу саугъа жаланда мени илму жетишимлерими белгилеу тюйюлдю. Ол саулайда бизни институтубузда окъутханланы бийик даражаларын ачыкълагъан ышанды. Республикада мектепге дери билим бериу анга энчи эс бурууну, аяулу къарауну излейди. «Школгъа дери билим бериу Олимп» саугъа уа бизге, алимлеге эмда илму тинтиулени иш юсюнде хайырланнганлагъа, устазлагъа психологиялы тутхучлулукъ этиуню жангы мадарларын къураргъа эмда хар сабий да къоркъуусуз болумлада айнырча этиуге кюч-къарыу да берликди. Аны бла бирге уа ол уллу жууаплылыкъды, университетибиз ючюн ёхтемликди эмда андан ары айныргъа бла жетишимлери болургъа элтген жангы атламды, - дегенди Римма Багова.
Сагъынылгъан жыйылыуну модераторлары уа ОМЕП Школгъа дери юйретиуню россейли комитетини президенти Лариса Шевченко болгъанды. Ол, алыкъа быллай даражагъа саугъа быйыл биринчи кере берилгенликге, жыйылыугъа Россейни жер-жерлеринден аслам адам келгенин чертгенди. Ары жыйылгъанланы къыралны белгили экспертлери, саугъагъа тийишлилени сайлагъан жюрини келечилери РАО Билим бериу араны таматасыны орунбасары Эммануил Баграмян, РМА-ны академиги Ирина Комарова, башхала да алгъышлагъандыла.
«Школгъа дери билим бериу Олимп» атлы саугъаны башламчылары эмда къурагъанла Къырал Думаны регион политика эмда жер-жерли самоуправление жаны бла профильли комитети, Россейни муниципал академиясы, ОМЕП Мектепге дери юйретиуню россейли комитети, РФ-ни сенатору Вячеслав Тимченко эмда бир ненча жамауат эксперт советлени келечилери болгъандыла.
Мокъаланы Зухура
хазырлагъанды.
