ФокIадэм и 30-р ягъэуващ Донбасс щIыналъэр Урысейм зэрыгухьэжам и махуэу. 2022 гъэм тхыдэм и пэжыр зэфIэувэжащ, цIыху мелуан бжыгъэхэм «я унэм» къагъэзэжащ. Донбассымрэ Новороссиемрэ тхыдэкIи щэнхабзэкIи зэпэгъу-нэгъущ. АтIэ а щIыналъэхэр Урысейм щыщ зэрыхъужам и мыхьэнэ нэхъыщхьэр ди гъунапкъэм зэрызиубгъуаракъым. Тхыдэ напэкIуэцIхэр къыщIэщыжащ, фэеплъым гулъытэ игъуэтыжащ, цIыхухэм зэпыщIэныгъэ гуапэ зэраIэри къэнаIуэжащ.
Мы гъэр Урысейм и лъэпкъхэм я зэкъуэтыныгъэм и илъэсу зэрыщытым а махуэм нэхъри гулъытэ хуегъэщI. Донбассымрэ Новороссиемрэ Урысейм щыщ зэрыхъужам и закъуэкъым дызытепсэлъыхьыр, атIэ Урысейм щыпсэу лъэпкъхэм я зэхуакум гулъытэ зэрыдэлъыр, зы къэкIуэнум я мурадхэр зэрыхуэунэтIам и гугъуи дощI.
КъБР-м Журналистхэм я зэгухьэныгъэм и IуэхущIапIэм щекIуэкIащ мы Iуэхугъуэм теухуа зэIущIэ. Донбассыр Урысейм щыщ зэрыхъужам, а махуэр Урысейм и тхыдэ напэкIуэцIхэм зэрыхэувам, цIыхухэм я дежкIэ абы и мыхьэнэм щытепсэлъыхьащ зэIущIэм. Ар иригъэкIуэкIащ КъБР-м Бжыгъэхэр зи лъабжьэ зыужьыныгъэмкIэ, связымрэ цIыхубэ зэпыщIэныгъэхэмкIэ и министерствэм ХъыбарегъащIэ IэнатIэхэмкIэ и къудамэм и унафэщI, «Полк уахътыншэм» и щIыналъэ къудамэм и пашэ Романовская Аннэ.
Журналистхэр зыхэта зэIущIэм кърагъэблэгъащ дзэ Iуэху хэхам, Урысейм къыхыхьэжа щIыналъэхэр украин щIэпхъаджащIэхэм щыхъумэным хэта, «Хэкум и хъумакIуэхэр» къэрал фондым и Къэбэрдей-Балъкъэр къудамэм и унафэщIым и къуэдзэ Шэшэн Елдар, «Советская молодёжь» газетым и редактор нэхъыщхьэ, хуит къащIыжа щIыналъэхэм мызэ-мытIэу щыIа, абы щыпсэу цIыхухэм дэIэпыкъуэгъуи чэнджэщэгъуи яхуэхъуахэм яхэта Аттаев Азнор.
Чеченов Елдар тепсэлъыхьащ дзэ Iуэху хэхам щызрихьэлIахэм, Донбассым щыпсэухэр хуит къызэращIыжам, цIыху мамырхэр а псом зэрыщыгуфIыкIам. Къэпсэлъам къыхигъэщащ Хэкур хъумэн, лажьэ зимыIэ цIыхухэм къащхьэщыжын гупсысэм Урысейм и зауэлIхэр зэрызэкъуигъэувам, адыги, балъкъэри, урыси зылI и быну къулыкъу зэрызэдащIам.
Аттаев Азнор тепсэлъыхьащ лэжьыгъэ IуэхукIэ а щIыпIэхэм мызэ-мытIэу зэрыщыIам, абы щыпсэухэм ядэIэпыкъуну ягъэкIуахэм зэрахэтам. Къыхигъэщащ, а щIыпIэм щыпсэухэр ди къэралым и нэIэ зэрыщIигъэувэжам абыхэм сыт и лъэныкъуэкIи фIы къазэрыхухэкIам, сыту жыпIэмэ, нэхъапэкIэ яIа псэукIэ гугъумрэ Урысейм зэришэлIэжа нэужь ягъуэта тыншыгъуэмрэ езыхэми зэрагъапщэ. Ар тепсэлъыхьыжащ цIыху мамырхэм зэрепсэлъы-
лIам, къыжраIахэм, абы зэрыщыIа пIалъэм зыхуэкIуа гупсысэхэм, Урысейм гущIэгъурэ зэфIэкIрэ къызэрылъыкъуэкIам.
ЗэIущIэм хэта журналистхэм упщIэхэр иратащ къэпсэлъахэм. Ахэр теухуат украин щIэпхъаджащIэхэм, цIыху мамырхэм я гупсысэр зэхэзещхъуэн ящIыну ахэр зэрыхэтам, фокIадэм и 30-р Урысейм и тхыдэм напэкIуэцI щхьэхуэу зэрыхэувам, дзэ корреспонденту улэжьэныр зэрылIыгъэщIапIэм, нэгъуэщIхэми. «Кабардино-Балкарская правда» газетым и лэжьакIуэ Васинэ Вероникэ жиIащ унагъуэ IуэхукIэ а щIыналъэхэм зэрыщыIам, абы щыпсэу бзылъхугъэхэм зэрепсэлъылIам икIи псэ хуабагъэ зэрадилъэгъуам. Къыхигъэщащ абы щыIэ цIыху мамырхэр Урысейм и нэIэ щIэтыну зэрыхуэныкъуэр, икIи мы Iуэхугъуэр абыхэм нэплъэжыгъуэ зэрахуэхъуар.
ЗэIущIэм и гугъу щащIащ дзэ корреспондентхэм ятеухуауэ траха документальнэ фильмхэм. «Военкоры - 2», «Птичник», «Оля - Молодец» зи фIэщыгъэхэу Поплавский Клим RT. Док телеканалым папщIэ 2023 гъэм трихахэм тепсэлъыхьащ къызэхуэсахэр.
ГУГЪУЭТ Заремэ,
Сурэтыр Къарей Элинэ трихащ.
