Быйыл 26 эм 27 сентябрьде Минги тауну этеклеринде «Таза тау» деген тёрели экологиялы фестиваль ётгенди. Ол эки кюнню ичинде баргъанды эм анга къыралны регионларындан мингден артыкъ волонтёр къатышханды. Аны ючюн жаланда алгъадан https://kavkazrf-event.timepad.ru/event/4193405/ сайтда регистрацияны ётерге керек болгъанды.
Биринчи кюнде субботник Минги тауну этеклеринде баргъанды. Волонтёрла къауумлагъа юлешинип, Азау таладан (2350 метр) башлап, «Мир» (3500 метр) станциягъа дери талай жерни кир-кипчикден тазалагъандыла.
Эсге сала айтсакъ, фестивальгъа къатышханланы Нальчикден эм Минеральные Воды шахардан транспорт бла келтирирча мадар да этилгенди. Ала битеу керек затла бла жалчытылыннгандыла: къол къапла, машокла, канат жолгъа хакъсыз билетле эм жылы аш бла да. Эки кюнню Азау талада Шимал-Кавказ федерал округну эм башха регионладан къол усталаны чыгъармачылыкъларыны, белгили аш-сууланы ярмаркасы, диджейле ойнатхан музыка эм дискотекала да бардырылгъандыла.
Экинчи кюнде уа Туризмни битеудуния кюнюне атап, акциягъа къатышханланы жарыкъландырыу программала сакълагъандыла. Аны кезиуюнде хауа эмда табийгъат болумланы тинтиу бла кюрешген специалистле, культурологла, къаячыла жыйылып, тау туризмге жангы къарамлары бла шагъырейлендиргендиле. Ахырында СКФО-да вузланы студентлери Азау талада терекчикле орнатхандыла, ызы бла жыйылгъанланы уллу концерт эм ингирде уа дискотека сакълагъанды.
- Жыл сайын фестивальгъа къатышханланы, огъурлу жумушха уллу кёллю болмагъанланы санына къошула баргъаны бек къууандырады. Жамауат бирлешсе, жетишимле болдурмай амал жокъду. Быйыл субботник биринчи кере эки кюннге созулгъанды эм анга иги кесек адам къатышыргъа онг тапханды. Сегиз жыл мындан алгъа биз бу акцияны къурагъанда, тауну кир-кипчикден тазаларгъа Камчаткадан, Сахалинден, Калининграддан да адамла келлик сунмагъанбыз. Бир-бир къонакъла уа энчи отпуск окъуна алып, сабийлери, туудукълары бла да къатышханларын билеме. Ол шарт Россейде халкъланы бирликлерини жылында бютюн магъаналыды», - дегенди Кавказ.РФ-ни башчысыны орунбасары Беккаланы Хыйса.
Эсге сала айтсакъ, фестиваль биринчи кере 2018 жылда ётгенди. Анга курортну ишчилери эмда 200 волонтёр къатышып, 5,5 тонна кир-кипчик жыйгъан эдиле. Бюгюнлюкде уа табийгъатны игилендириуге къошумчулукъ этерге излегенлени санын мингле бла санарчады. Сёз ючюн, былтыр огъурлу ишге 3700 адам, ол санда 500 сабий къатышхан эселе, быйыл аланы саны 5 мингден атлагъанды. Саулай алып айтханда, ала кир-кипчикден 15 тонна жыйгъандыла.
