Россейни Аманлыкъчыланы терсликлерине жолукъдуруу жаны бла федерал службасыны КъМР-де Управлениясында бардырылгъан «тёгерек столда» тутулуп тургъанланы жашау болумларын жамауат тинтиуледен сора ачыкъланнган шартла сюзюлгендиле. Сёз ведомствону бла жамауат организацияланы арасында байламлыкъланы кючлеуню юсюнден да баргъанды. Тюбешиу уголовно-толтуруучу системаны борчларын толтургъан кезиуде ёлтюрюлген къуллукъчуларыны хурметине бир минут шумсуз туруудан башланнганды. 
 Управленияны башчысы Александр Демидов ишеклилени, терсленнгенлени эм  тутулуп тургъанланы медицина излемлери жалчытылыннганларын белгилегенди, учреждениялада бардырылгъан жангыртыу ишлени юслеринден да айтханды. 
- Мюлкюбюзню айнытыугъа, ишчи жерлени кёбейтиуге  баш магъана бериледи. Жууукъ заманда 4-чю номерли колонияда тигиучю цех ачыллыкъды, 5-чи колонияда уа кюз арты урлукъланы себип башлагъанбыз, - дегенди ол.
Жамауат-къараучу комиссияны башчысы Азрет Шапсигов къол кётюрюуню кюнюнде ОНК-ны келечилери учреждениялада айырыула къалай баргъанларын сюзюп тургъанларын айтып, сайлау къуралыулу болгъанын чертгенди. 
Жылны аллындан бери уа комиссияны келечилери учреждениялада 30 кере болгъандыла, тутулуп тургъанла бла тюбешиуге къуралгъандыла. Аладан жашау болумлагъа тарыгъыула келмегендиле.  
- Жарыкъландырыу, право билимни жайыу жумушла, лекцияла бардырыладыла, юридический болушлукъ хакъсыз бериледи. Жууапха эркинликлери сыйырылмай тартылгъанла къайтарып аманлыкълагъа къатышмазча ангылатыу жумушла да къураладыла. Бу ишде уа пробацияны мадарлары уллу болушлукъдула. Комиссияны бла ведомствону араларында байламлыкъла чырмаусуз къураладыла,-дегенди ОНК-ны таматасы.  
 Кенгешге къатышханла бирге хайырлы иш толтурулгъанын белгилеп, аны бютюнда кючлерге кереклисине келишгендиле. 

Тикаланы Фатима 
хазырлагъанды.