Кёп болмай билдиргенибизча, озгъан ыйых кюнде Нальчикде «Минги тауну кубогу-2026» халкъла аралы чаришле бардырылгъандыла. Бу жумушну къурагъанла аны КъМР-ни Башчысыны саугъасына, Минги тауну Кубогуна эмда республиканы Къыраллыгъыны кюнюне атагъан эдиле. Ипподромгъа къумалы атла бла алчы атлыла, юйретиучюле, спортну бу тюрлюсюн сюйгенле жыйылгъандыла.

Кубок ючюн эришиу 2400 метр узунлукъда ётгенди, анга юч эмда андан кёпжыллыкъ алты чабыучу ат чыкъгъанды. Бу чаришни саугъа фонду бир миллион сом эди. Къызыу эришиуде биринчи жерни Эридан ажир алгъанды (атлы  Гусейн Гусейнов). Сагъынылгъан 2400 метрни ол 2 минут бла 30,5 секундха ётгенди.

Ол кюн ипподромда 1200-2800 метр узунлукъгъа битеу да онбир чариш болгъан эди. Ингилиз къумалы атла, айтханыбызча, талай сыйлы саугъа ючюн эришгендиле. КъМР-ни Башчысыны саугъасын Анзор Альбердиев Гефест Дрим ажири бла алгъанды.

Жашны къолуна аны Казбек Коков кеси тутдургъанды.

Башчы, бу эришиулени къурагъанлагъа эмда анга къатышханлагъа да ыразылыгъын билдирип, «Минги тауну кубогу-2026» быйылгъы чариш кезиуню бек жарыкъ болгъанын белгилегенди.

Ипподромда байрам жаланда спорт бла чекленип къалмагъанды: шахарчылагъа, къонакълагъа да концерт бардырылгъанды.

Омарланы Мурат.