Окъуу жылны аллында Къабарты-Малкъар университетде ректорну къуллугъун толтургъан Юрий Альтудов биринчи курсда окъурукъ хунерли студентле бла тюбешгенди. Быллай студентле уа талай жылдан бери мында ахшы тёреге айланнгандыла. 

Быйыл КъМКъУ-гъа Бир къырал сынаулада бийик баллагъа тийишли болгъанладан жюз адам киргенди. Аланы арасында алтаулан а башха-башха дерследен 100 балла алгъандыла. Тюбешиуню кезиуюнде ачыкъ ушакъ баргъанды эмда студентле билирге излеген затларыны юслеринден соруула бергендиле, окъуу юйню онгларын да билгендиле. 

Тюбешиуню ача, Юрий Альтудов университетни бийик жетишимлерини юслеринден айтханды. «Интерфакс» билдириуле агентствода басмаланнган бийик окъуу юйлени Миллет рейтинглерине кёре, 2026 жылда КъМКъУ топ-50 тизмеге тюшгенди эмда, Россейни эм ахшы вузларыны RАЕХ-100 рейтингине къошулуп, кесини даражасын бегитгенди. Андан тышында да, университет академиялы алчылыкъны «Приоритет-2030» программасына киреди, аны алайлыгъы уа ышаннгылы илму проектлени  айнытыргъа онг берликди. 

- Биз хар жаш адамгъа да кесини хунерин ачыкъларгъа, айныргъа да амал болурча энчи онгланы къурайбыз. Муратыбыз: ала окъууларын бошар заманнга ахшы билимли эмда кеслерини жерлерин тапхан устала болурча юйретиудю, - деп чертгенди Юрий Камбулатович.

Кесини билимини юсюнден соруугъа жууап бере, анга къыралны юч белгили университетинде окъургъа къадар насып бергенин айтханды. Ол, КъМКъУ-да, МИФИ-де, МНЭПУ-да билим алгъанын хапарлай, Советлени къыралыны кезиуюнде хунерли жаш тёлюге тутхучлукъну, къайгъырыуну да эсгертгенди. Студентле тургъан жерге келип, Нобель атлы саугъагъа тийишли болгъан Николай Басов жаш адамла бла энчи халда тюбеп, ала бла ушакълашып, илму жаны бла сейирлерин къозгъаргъа, ангыламагъан затларын тюшюндюрюрге къошумчулукъ этгенини юсюнден айтханды. 

Ушакъны кезиуюнде энчи эс тарихли технологияланы эмда жалгъан акъылны айныуларына бурулгъанды. Юрий Альтудов окъуугъа энди кирген жашлагъа бла къызлагъа хар неге да эс бурургъа, сейир этерге чакъыргъанды.

- Сизни баш борчугъуз: сорууну тюз бере билиудю, эшитген, билген затыгъызны магъанасыны юсюнден сагъышланыуду. Жалгъан акъыл сюймеклик, ийнаныу, адамланы арасында бир бири бла келишиу дегенча темалагъа сейирсиналмайды, соруу да салалмайды, бу жаны бла сизни ангылауугъуз кючлюрекди, - дегенди. 

КъМКъУ-ну жетишимлерин белгилей, окъуу юйню таматасы тёрели университетни илму ызларыны бирлешиуюн чертгенди. Юлгюге уа вузну Россейни Минпромторгуну эл мюлк эмда авиациялы техникалагъа резин чархланы жарашдырыр ючюн жангы къатышмаланы (смесь) чыгъарыу жаны бла уллу эришиуюнде хорламын келтиргенди. 

- Ол борчну тамамлар ючюн, жаланда химия неда физика бла чекленип къалынмагъанды, анга филологла, жалгъан акъыл жаны бла устала да керек болгъандыла. Аллай дисциплинала аралы къауумну уа къураргъа жаланда тёрели университетни келликди къолундан, - деп ангылатханды окъуу юйню башчысы. 

Тюбешиуде, андан сора да, вузда хунерли жаш тёлюге тутхучлулукъ этиуню алагъа деп къуралгъан онгларыны юслеринден да эсгертгенди. Былайда сёз бийик балла бла окъуугъа киргенлеге эмда халкъла аралы илму конференциялада жетишимли болгъан студентлеге бёлюннген ырысхы саугъаны юсюнден баргъанды. 

«Приоритет-2030» программагъа къошулгъаны бла бирге, КъМКъУ «Сбербанк» ПАО, «Яндекс» эмда «Тинькофф» компанияла бла, «Курчатовну институту» Миллет тинтиу ара бла да байламлыкъланы тири айнытады. Аладан экспертлени университетге дайым да келгенлери энди тёреге айланнганды. Ала, студентлени алчы практикала эмда технологияла бла шагъырейлендирип къалмай, кеслерин проектлерине къатышырыкъ хунерли жаш адамланы да излейдиле.

Юрий Альтудов жашланы бла къызланы  алчылыкъны ышанларын айнытыргъа, университетни жашаууна тири къатышыргъа чакъыргъанды. Ахырында уа тюбешиуге жыйылгъанла барысы да бирге суратха тюшгендиле. 

Трамланы Зухура хазырлагъанды.