Чегем шахарда шёндюгю излемлеге келишген жамауат тийре къурала турады. КъМР-ни Къурулуш эм ЖКХ министерствосундан билдиргенлерине кёре, ол анда Къыбыла деген жангы микрорайонда юч гектарны алып, солуу эмда заманны зауукълу ётдюрюу жер боллукъду.
Анда уа «Шахар ычхындырмайды» деген проектге кёре жаяу жюрюрге сюйгенлеге жолчукъла, шош солуйма дегенлеге тийишли жерле, сабийлеге ойнарча эмда спорт бла кюреширча комплексле, сора фонтанлары бла майдан боллукъду. Ол бары да «Жашау этерге инфраструктура» миллет проектни чеклеринде этиледи.
Ишле шёндю тири барадыла, подряд биригиуню къурулушчулары фонтанны хазырлай турадыла. Ары дери уа анга жер тюбю бла битеу коммуникацияланы созгъандыла, бетондан орун да жарашдыргъандыла. Дагъыда жолчукъла ишлене турадыла, майданчыкълагъа уа спорт эмда оюн оборудование салыргъа хазырланадыла. Ызы бла тийреде мингден артыкъ терек эмда юлкю орнатырыкъдыла.
Бу аламат жер сагъынылгъан микрорайонда жашагъанлагъа, башхалагъа да солургъа эмда заманларын зауукълу ётдюрюрге онг берликди, деп белгилегендиле министерствода.
Омарланы Мурат.