Чегем районну администрациясындан билдиргенлерича, кёп болмай Россейни халкъларыны тиллерини кюнюне аталып Чегемде Хорламны паркында «Мени юйюрюм – Россей» деген этнофестиваль бардырылгъанды. 
Эсге сала айтсакъ, быйыл бу байрам Россейни Президенти Владимир Путинни башламчылыгъы бла биринчи кере белгиленеди. Ол ана тилибизни магъаналылыгъын, тёлюлени байламлыкъларын, къыралыбызны халкъларыны маданият хазналарын сакълаугъа уллу жууаплылыкъны эсге салады. Тил, адет-тёреле, миллет кийимле - ала бары да миллетни маданиятын, энчилигин кёргюзтген шартладыла. Бу затла къайсы миллетни да бетин ачыкъларгъа себеплик этедиле.
Ол кюн къонакъланы бай программа сакълагъанды. Ол санда миллет арбазла къуралгъандыла. Аланы миллет, тарых энчиликлери, ашлары кеслерине кёплени тартхандыла. Андан сора да, эртте заманланы адырлары, миллет кийимле, къолдан усталаны багъалы темирледен бла ташладан этилген аберилери эм башха ишлери да къараучуланы сейирге къалдыргъандыла. Бир-бирле уа, мастер-класслагъа къатышып, кеслерини хунерлерин ачыкъларгъа да угъай демегендиле. 
Ызы бла районну артистлери, окъуучула эм устазла да къатышып, уллу концерт программа болгъанды. Сахнадан айтылгъан орус, къабарты, малкъар тилледе жырла, назмула къараучуланы кёллерин алгъандыла. 
Саулай алып айтханда, фестиваль ана тилни багъалыгъын, аны сакъларгъа эм ёсе келген тёлюлеге да юйретирге кереклисин къайтарып эсге салгъанды.